Herêma Botanî de bi serran o talankerdişê xoza dewam keno. Wekîlê DEM Partî yê Şirnexî Zekî Îrmezî derheqê babete de ajansê ma rê qisey kerd.

Îrmezî ard ziwan ke talankerdişê xozaya Botanî newe nîyo, dewamê polîtîkayanê asayîşî yê vera Kurdîstanî yo. Îrmezî vat: ‘’No berhemê aqlê dewlete yê seserrî yo. Serranê 90an de vêşnayîşê dewan ra heta vêşnayîşê daristanan xeylê kerdişan hem zerar da cuya şarê Botanî hem zî cografyaya ci. 2018 ra dima nê polîtîkayî sey sîstematîkî ameyî kerdene. Her cayê Botanî de darî birîyenê. 10 daristanî bi temamî ameyî çinkerdene. Herêmanê Besta, Gabar, Belega, Silopîya û Elkê de waranê Melesa û Hemka de birnayîşê daran zêdîyayo.’’

Îrmezî vist vîrî ke Mudirîya Daristanan a Şirnexî birnayîşê daran rê bahaneya ‘ciwankerdişî’ pêşkêş kena û vat: ‘’Nê darî seba rantî pêşkêşê şîrketan yenê kerdene û waranê daristanan de leşkerî têgêrenê. Cigêrayîşê petrolî bi xo beno sebeb ke Koyê Gabarî de ekolojî çin biba.

Şarê Şirnexî bi qirkerdişê ekolojî razî nîyo. Ganî no nêrazîbîyayîş bivurîyo çalakîyan. Meseleya xoza tena meseleya şarê Şirnexî nîya. Eke wina şêro herêma Botanî de do darî nêmanê. Sîstemê ma yo ekolojîk, warê ma yê cuye û tarîxê ma yenê çinkerdene.’’