Rayber Apoyî Zîndanê Îmraliyî rê seba Akademîya Jineolojî ya 30ê Gulane mektubêke şawitibî. Ma mektube weşanenê:

‘’Domanîya xo ra nata mi xîret kerd ke ez do biba embazê cinîyan o tewr hol. Têkilîya min a bi dadîya mi de zî cigêrayîşê min ê seba cinîya azade est bi. Ez sey pabesteyê xeyalanê xo yê domanîye ciwîya û mi têkoşînê azadîya cinîyan vet werte.

Wexto ke ez ameya ardene bi Zîndanê Îmraliyî mi vatibi ke ‘xebata min a azadîya cinîyan nêmcet mende.’ Hinî na xebate temam bîya û naye ra pey ganî bêra caardene.

Têkoşînê azadîya cinîyan mîrasêko girîng aferna. Nê mîrasî bi hezaran şehîdî dayî û erjê pîlî awan kerdî.

Mi tim waşt ke cinîyî biciwîyê û her mergê înan ez dejnaya. Mi seba cinîyan krîterê hêvîye aferna. Mi vat ke her cinîye ganî azad biba.Mi zî sey camêrdêkî bi nîsbetê etîk û estetîkî yê cinîyan perwerde kerd. Mi vat ke krîterê sosyalîzmî yo verên azadîya cinîyan a. Seba camêrdan zî nîsbetê sosyalîzmî cuya raşte ya bi cinîyan a. 

Projeyê min o nêmcetmende bi Jineolojî aver şi. Mi bi nê mefhumî kerd ke meseleya cinîyan hol pênase bikera. Heta ke meseleya cinîyan nêra çareserkerdene, yew meseleya bîne ya komelî çareser nêbena.

Jineolojî seba nê armancî rayîreko hol viraşt. Kedêka ercîyaye dîyaye. Ganî hinî na kede bi prosesê neweyî hîna manadar biba. Nasnameyê cinîyan û pênasekerdişo raşt ê estbîyayîşê cinîyan bi metodê estbîyayîşî ganî bêrê ercnayene.

Ganî nasnameyê cinîyan cînsîyetperestîye ra bêro pakîkerdene. Ganî cinîyî seba ney bala xo bidê. Seke Woolfe vana ganî yew odaya cinîyan est ba. Ganî cinîye xo ser bifikirîya û xo înşa bikera. Ez zanena ke cinîbîyayîş çend zehmet o coka wina vana. Binê kulturê tecawuzî yê camêrdan de bi azadî xoawankerdiş seba cinîyan zehmet o. La ez nêzanena ke cinîyî na raştîye ver de sey mi hêrs benê, dejenê yan ney. Ez bi nê hêrsî her roje xo hetê fikrî ra newe kena, çareserîye ber ana û seba ke cinîye azad biciwîya ciwîyena. Manaya cuye mi de raştîya winayêne awan kena.

Femînîstan pers kerdo ke ‘Çira serê têgêrayîşê cinîyan ê kurdan de yew camêrd est o?’ Xebera înan a. Werrekna cinîyan na serkêşîye bikerdêne! Mi zî no waştêne. Heyf ke tena têgêrayîşê kurdan de ney hema na serkêşîye cayêk de nêvejîyaya werte. Mi tim seba ke cinîya azade awan biba projeyî kerdî, mefhumî afernayî, îdeolojîya azadîya cinîyan û jineolojî aver berdî, mi hêzê rêxistinîya nînan da. Mi kerd ke cinîyî mîyanê komelî de bibê û camêrdî bivurîyê. Ez wazena ke cinîyî mi na raştîye fam bikerê.

Ez zanena ke seba prosesê ‘’demokrasî û haştîye’’ yo ke ma wazenê aver berê cinîyî do serkêşîye bikerê. Wayîrê nêmeyê ra zafêr ê nê serkewtişan cinî yê. Ez wina bawer kena ke cinîyî do naye ra pey zî serkêşîye bikerê. Ez do tim şima çendek hewce bikerê şima de biciwîya û şima reyde biba.’’

Rayber Apoyî warê hewagirewtişî yê zîndanî gileyêkê vajî zî sey dîyarîye şawite.