Dewleta tirke Serêkanîyê û Girê Sipî de ke binê îşxalê dewleta tirke de yê, binê nameyê 'îmhaya mayinan' de perwerdeyê şerî dana domananê ke serrê înan 18 ra qijêr ê.

Hemsereka Rêxistina Heqanê Merdiman a Herêma Cizîre Evîne Cuma ANFyî rê qisey kerd û pare kerd ke dewleta tirke sûcê şerî kena. Cumayî vat: ''Verî zî eşkera bi ke xebatê winasên ê dewleta tirke estê. Efrîn de wexto ke mabênê cergan de şer qewimîyan domanêko ke serê ci de kincê leşkerî estbî merdbi. Dewleta tirke domanan seba şerî şuxilnena. Domanê Sûrîye perwerde benê û erşawîyenê Lîbya.''

Cumayî da zanayene ke seke fotograf de zî dîyeno leşkerê tirke perwerde de dombayan danê domananê 15 serreyan û vat: ''Dewleta tirke Sûrîye de îşxalker a. Ganî a seba nê sûcanê xo hesab bida. Ganî heyetêko mîyanneteweyî bêro û rewşa domanan bivîno. Ganî dezgeh û rêxistinê mîyanneteweyî wezîfeyê xo bîyarê ca.''

Meclîsê Tirkîya de zî bibi rojdem ke dewleta tirke Sûrîye de çeke dana domanan. Hetkarê Serekê Pêroyî yê Têkilîyanê Teberî ra Berpirsîyar û Wekîlê CHPyî Unal Çevîkozî 25ê teşrîna peyêne de Heyetê Pêroyî de pare kerdbi ke artêşa tirke Sûrîye de çeke dana destê domanan û se ra 40ê endamê Artêşa Mîllî ya Sûrîye 18 serre ra qijêr ê.