Dewleta Tirkî destpêkî ra nata seba ke Sûrîye de destek bido polîtîkayanê îşxalkarîye û Şorişê Rojawanî tasfîye bikero her tewir destekî da çeteyanê sey Ahrar Şam, Cebhet el Nûsra, DAÎŞ ûsn.

Goreyê belgeyo ke ANF resa ci, 7’ê Temmuz a 2013’î de depoyêkê dermanan ê qezaya Reyhanli yê Hatayî de, bi nameyê “hetkarîya hewceyan rê” ê wextan de xeylî dermanî şirawitê Til Ebyad (Girê Sipî) ke a game destê Ahrar Şam, Nûsra û DAÎŞ’î de bi.

 Belgeyo ke ma dest de yo verê hêrişê Til Ebyadî yê serê Kurdan rojêk de depoyê dermanan ê Reyhanli ra ameyê şirawitene, nê ra fam beno ke 19’ê Temmuz a 2013’î de dermanî bi kargo ameyê şirawitene. Serê belgeyî de yeno nuştene ke sere A. Alshaban yan zî Aslbaban ameyê şirawitene, kesêko bi nameyê Fîrdevs Ogoevî tesdîq kerdo û îmzaya her di şexsan zî esta. Gama ke merdim bala xo dano dermananê ke ameyê şirawitene, zafane seba emelîyatan yan zî dimayê emelîyatan vindarnayîşê dejî yê, gama ke birînî qişam gênê yenê şuxulnayene.

 2012 de Çeteyî Girê Sipîyî de Bî

Bi şorişê rojawanî gama ke Kurdan herêma xo kontrol kerde çeteyî bi paştdayîşê Tirkîya 19’ê Êlul a 2012’î kewtîbî Til Ebyad, 2013 de zî Til Ebyad destê çeteyanê cîhadîstan ê El Nûsra, DAÎŞ û Ahrar Şamî de bi. Ê prosesî de Kurdanê Til Ebyadî, Şehba û Minbicî seba ke xo bipawê Cebhet el Ekrad awan kerdibi û bi fermî binê banê OSO’yî de bî.

20’ê Temmuze de Hêrişê Kurdan Kerdibi

Nê dermanî yê ke verê hêrişê çeteyan ê serê Girê Sipîyî rojêk de ameyê şirawitene, nîşanê amadekarî yê. Reyna vejîya werte ke Tirkîya şerê hemverê Kurdan de fînansor û plankerdoxê çeteyan a. Çeteyan 19’ê Temmuze de hoperloranê camîyan ra veng dabi Kurdan ke Girê Sipî ca verdê, gefî Kurdan rê wendîbî û dima ra zî eştibi serê keyeyanê Kurdan. Çeteyan mêrdeyî kiştî, cin û domanî rehîn girewtî. YPG’yî pêhesnabi ke hêrişanê mabênê 20’ê Temmuze û 5’ê Tebaxe de 70 kesî ameyê qetilkerdene û 400 cinîyî ameyê remnayene. Girê Sipîyî de bi destê çeteyanê ke Tirkîya ra paştî gênê Kurdan ser o qirkerdiş ameyêne kerdene, pakkerdişo etnîkî ameyêne kerdene.