Berfîne sibata 1994î de dewa Heznî ya Til Temirî de dadîya xo ra bena. Keyeyê aye yo welatperwer hema destpêk de wayîrê Şorişê Rojawanî vejîya. Berfîne xêrê keyeyê xo yê welatperwerî ra domanîya xo de PKK şinasna û tim waşt ke biba gerîla.

Berfîne zî 2011 de tewra Şorişê Rojawanî bîye û wextêkê kilmî de bîye fermandare. Dima ke vera DAÎŞî serkewtiş ame destvistene Berfîne 2016 de verê xo da koyan. Berfîne warê Çiya Reşî de vera hêrişanê îşxalî yê dewleta tirke şer kerd û derbê giranî dayî dişmenî ro. A çalakîya xo ya peyêne de wexto ke waşt serê dişmanî ra çeka ci bigêra 11ê hezîrana 2022yî de şehîd bîye.

Waya aye Sîdare Xelef û dadîya ci Emşa Hemîd ANFyî rê qala Rihane Xelef (Berfîne Botan) kerde.

Emşa Hemîd ard ziwan ke Berfîne domana ci ya diyîne bîye û vat: ''Rihane mîyanê 8 domananê mi de aya tewr perwera mi bîye, jîr bîye. Aye heta sinifa 9. wend. Mamostayan vatêne a domanêka zaf jîhat a la aye nêwaşt biwana. Tim waştêne şora koyan.  Şorişê rojawanî seba Berfîne firsendêko pîl bi. A cade tewra şorişî bîye û dest eşt çeke. 2013 de seba ke aye bivîna ez şîya Serêkanîyê. Heta şewe erey ma pîya mendî. Aye vat wazena şora koyan. Ez zî ci rê nêbîya asteng. Ez pê keyeyê xo sereberz a. Mi tim paştî daye kênaya xo.''

Sîdare vat: ''A sey dadîya ma bîye. Ma tira vatêne dayê. Embazî 2011 de ameyî keyeyê ma. Ma o çax qij bîyî. Berfîne tim bi zerrîgermî embazî pêşwazî kerdêne. Tewr peyên 2016 de mi a dîye. Ma yewbînan ra xatir waşt. Serê aye de kincê gerîlayan est bîyî. Aye mi rê vat ke a ha şina û hêvî kena ke rojêke ez zî şora hetê aye. Dima ke Berfîne şîye ez zî tewra YPJyî bîya. Ez zî sey aye bîye şorişgêre.''