Pêşmerge û îdarekarê verênî yê PDKyî Îsmaîl Elî Îsmaîlî derheqê hêrişanê kîmyewîyan ê dewleta tirke ya îşxalkere de ANFyî rê qisey kerd. Îsmaîl Elî Îsmaîlî 2019 de vera sîyasetê serê Rojawanî tewir mojna PDKyî û bi hawayêkê nefermî derbazê Rojawanê Kurdîstanî bi.

Îsmaîlî da zanayene ke 6 mengî yo vera gerîlayan çekê kîmyewîyî şuxilîyenê û vat: ''Rixmê nê hêrişan zî artêşa tirke pê xoverdayîşê gerîlayan nêeşkaye. Dişmeno barbar nê çekanê kîmyewîyan têna vera gerîlayan nê vera şarî û xozaya Kurdîstanî zî şuxilneno. Hukmatê Herêma Kurdîstanî zî paştî dano nê hêrişan. PDK destek dano dişmenî. 6 mengan de 44 gerîlayî hêrişanê kîmyewîyan de şehîd bîyê la PDKyî hema zî derheqê babete de eşkerayîyêke nêdaye.''

Îsmaîl Elî Îsmaîlî ard ziwan ke PDK verê xoverdayîşî de asteng o û vat: ''PDK nêverdeno şar vera dişmenî têbigêro. Naye ra eşkera beno ke PDK paştî dano dewleta tirke. Ganî şarê ma vera nê hêrişanê îşxalî û kîmyewîyan çalakîyanê xo bizêdîno û îqtîdarî vindarno.''