Vakur û Rojhilatê Sûrîye de wesîleya serrgêra 3ine ya îşxalê vera Efrînî yê dewleta tirke hezaran kesî vejîyayîşî kuçeyan û  îşxalkerî şermezar kerdî.

Şêrewa

Qezaya Şêrawa ya Efrînî de rayrşîyayîşêko pîl ame organîzekerdene. Çalakîye ke bi rêzgirewtişî dest pê kerde bi nameyê Îdareyê Xoserî yê Hêrema Efrînî Şîraz Hemoyî qisey kerd.Hemoyî vat: ''Herêma Efrînî ya efrînijan a. Efrinîjî erdê xo ra vejîye zî ruh û fikrê înan ûca de yo. Efrinijî sey zeytunêre yê çend gile înan bêrê birnayene zî qoqê ci tim cayê xo de maneno.'' Binameyê Îdareyê Xoserî yê Rojawanî  Hemdan El Ebîd zî ard ziwan ke dewleta tirke wazena ke sîstemê wayûbiratîya şaran çîn bikero û vat ê do ser nêkewê. Eyşa Memûda ke bi nameyê Koordîsanyonê Kongraya Starî yê Herêma Efrînî qisey kerd, soz da ke do gonîya şehîdan erdî de memano.

Heleb

Taxanê Şêxmqsûr û Efrefîyê yê Helebî de zî bi hezaran kesî vejîyayî kuçeyan îşxalê dewleta tirke yê vera Efrînî şermezar kerd. Badê rayraşîyayîşî Meydanê Şehîde Destîna de mîtîngêk ame kerdene. Hemserekê Pêroyî yê Meclîsê Halebî Mihemed Şêxoyî ke tîya qisey kerd vat ê bê hêzê  HRE, QSD û YPGyî kes nas nêkenê. Şêxoyî ard ziwan ke wextê hesabpersayîşî ameyo û vat serkewtiş zaf nizdî yo.

Reqa

Reqa de zî bi eynî waştişî çalakîyêke ameye kerdene. Pîya bi temsîlkaranê dezgehanê sîvîlan selahîyetdarê leşkerî zî tewrê çalakîye bîyî. Qiseykerdişan de ame vatene ke dewleta tirke Efrîn de vera şarî sûcê şerî û merdimîye kena û dezgehanê mîyanneteweyî ra me waşteneke vera nayî bêveng mamenê. Fermadaranê Meclîsê Leşkerî yê Reqa Fesay El- Salîmî zî vat seba ke Efrîn, Serêknîyê û Girê Sipî berê azadkerdene xovedayîşê înan dewam keno.

Reyna Qamişlo, Tirbesipîyê, Til Hemîs, Til Berak, Girkê Legê, Til Koçer, Dêrik, Amûdê, Dirbêsiyê, Hesekê, Til Temîr, Kobanê, Minbic û Eyn Îsa de zî vera îşxalkeran çalakîyî ameyî organîzekerdene. Şar vejîya û meydanan û mesajê xoverdayîşî da.