DAÎŞ rojanê peyênan de Sûrîye û Rojawanê Kurdîstanî de vejîya werte û hêrişî kerdî. Nê hêrişî persanê 'DAÎŞ agêreno?' û 'Hêzê serdestî seba ke zor bidê yewbînan DAÎŞ gandar kenê' xo reyde anê.

QSDyî hukmê DAÎŞî adara 2019î de qezaya Baxozî ya Dêra Zorê de qedînabi. La DAÎŞî hewteyê verênî yê 2021î de dest pê hêrişan kerd. Dima ke hukmê erdî yê DAÎŞî qedîya bi hezaran endamanê ci Sûrîye û Iraq de xo nimit.

DAÎŞî Dêra Zorê, Reqa û Hama yê Sûrîye û şaristananê Kerkûk, Bexdad û Anbarî yê Iraqî de hucreyê xo gandar kerdî.

Hêrişê DAÎŞî zêdîyayî

DAÎŞî kanûna 2020î ra heta nika Dêra Zorê de 8, Reqa de 8, Hama de 10, Humus de 5 ve Halep de zî 2 hêrişî kerdî. Roja peyêne ya 2020î de DAÎŞî hêrişê rayîrê Palmîra û Dêra Zorê kerd û hêriş de 28 leşkerê rejîmî merdî. Keyeyê Çimdarîye yê Heqanê Merdiman ê Sûrîye (SOHR) zî da zanayene ke DAÎŞî hêrişê Hama de bi desan leşker û milîsî kiştî.

Gandarbîyayîşê DAÎŞî de rolê Tirkîya

Rejîmê Şamî vera etbîyayîşê DAÎŞî yê Dêra Zorê têkoşîn nêkeno.

La tewr zaf hêrişê dewleta tirke yê vera Rojawanî bîyî sebeb ke DAÎŞ newe ra gandar bibo. Kampanê herêman ê îşxalkerdeyan de xebatê DAÎŞî çend reyî medya de ameyî îsbatkerdene.

Operasyonê QSDyî

QSD vera DAÎŞî operasyonanê xo dewam keno. QSDyî 2020 de Dêra Zorê û Reqa de vera DAÎŞî 2 operasyonê pîlî û 25 operasyonê noqtayî kerdî. QSDyî nê operasyonan de bi seyan şikdarê DAÎŞî destbend kerdî.

Berpirsîyarê Çapemenîye yê YPGyî Sîyamend Elîyî hêrişê DAÎŞî ANFyî rê ercnayî.

Sîyamendî da zanayene ke tay hêzê serdestî seba ke zor bidê yewbînan DAÎŞ weye kenê. Sîyamend Elîyî vat: ''DAÎŞ pê hêrişanê surprîzan estbîyayîşê xo dewam keno û hêzê xo keno pîlêr. Rûsya û Îran qaşo seba 'pawitişê erdê Sûrîye' tîya de yê. La ê têna 'şaristananê xo yê stratejîkan' pawenê. Seba ke Rûsya sere de Til Temir û Eyn Îsa bala xo dana vakurê Sûrîye ser DAÎŞ xo rê firsend vîneno. Eke wina dewam bikero DAÎŞ do zêdêr hêrişan bikero. Ganî Rûsya û rejîmê Sûrîye QSDyî reyde vera DAÎŞî têkoşîn bikerê.''

Rojnameger Nazim Daştan zî eşkera kerd ke hêrişê vera Dêra Zorê, Palmira, Hama û Humuzî tesadûfî nîyê. Daştanî vat: ''DAÎŞ beno ke hêrişanê xo bizêdîno.Rûsya û Amerîka seba ke Sûrîye de serdest bibê kewtî pê. DAÎŞî zî nê pêkewtişî xo rê sey firsendêk dî.''