Efrîn de mîyanê 20 rojan de 300 sivîlî ameyî remnayene

Efrîn de artêşa Tirkî ya îşxalkare û komanê aye yê çeteyan mîyanê 20 rojan de 300 sivîlî remnayî.  

Hêrişê dewleta Tirkî ya îşxalkare û komanê aye yê çeteyan ê Efrînî yê ke hemverê şarî kenê dewam kenê.

Organîzasyonê Heqanê Merdiman ê Kantonê Efrînî sûcê îşxalkaran belge kenê. Organîzasyon belgeyanê xo seperneno çimeyanê bibaweran û şahidan. Goreyê belgeyanê organîzasyonî destpêkê îşxalê kantonê Efrînî ran ata 5 hezarî ra vêşêr kes ameyo remnayene û aqûbetê di hezaran kesan zî bewlî nêyo. Hêzanê îşxalkaran seba veradayîşê kesanê ke remnayê fîdye keyeyanê înan ra wazenê.

'Rojane Sivîlî Yenê Remnayene‘

Goreyê Organîzasyonê Heqanê Merdiman ê Kantonê Efrînî mîyanê 20 rojanê na menge de (Temmuze) 300 ra vêşêr sivîlî ameyê remnayene. Organîzasyonî nameyê kesanê ke ameyê remnayene û tarîxê ameyîşremnayîşê înan zî belge kerdî. Vervatoxê Organîzasyonê Heqanê Merdiman ê Kantonê Efrînî Îbrahîm Şêxoyî ard ziwan ke kesê ke ameyê remnayene serê wucûdê înan de şopê îşkenceyê fîzîkkîyî û ruhkîyî yenê dîyene û seba veradayîşê înan keyeyanê înan ra fîdye yeno waştene.

Hetêna ra Organîzasyonê Heqanê Merdiman ê Efrînî şewatê bax û baxçeyanê sivîlan zî belge kerdî. Goreyê belgeyî artêşa Tirkî ya îşxalkare 5’ê Temmuze de 200 ra vêşêr darî Efrîn de û 17’ê Temmuze de zî qezaya Şêrawa de adir na 300 ra vêşêr hêgayê genim û cewî.  Goreyê Organîzasyonî 15’ê Temmuze de artêşa Tirkî ya îşxalkare û çeteyanê aye qilê qezaya Cindirêsî adayî û perçeyê tarîxîyî tiritî. Heman wextî de serê qilî de bargehêko leşkerî awan kerd.