Dewleta tirke ya îşxalkere 19ê teşrîna peyêne ra nata bêmabên hêrişê Rojawanê Kurdîstanî kena. Efrînijê ke hêrişanê dewleta tirke ra dima neçare mendê ke koçê Şehba bikerê înan vera nê hêrişan nêrazîbîyayîşê xo mojna.

Mihemed Hisê Mustafa ard ziwan ke koçê înan ra dima zî hêrişan dewam kerd û vat: ''Dewleta tirke wazena pê nê hêrişan bi zorî şar bida koçkerdene. Dewleta tirke verê çimanê pêro dinya de hêrişê Rojawanî kena û dinya vera nînan bêveng a. Ma do vera nê hêrişan heta peynî xo ver bidê.''

Emîne Hesen pare kerd ke ê binê şertanê zehmetan de cuya xo rê dewam kenê û vat: ''Rixmê pêro zehmetîyan zî ma do tim rêçê şehîdanê xo ser de şorê. Pêro dinya vînena ke çi ameyo sereyê kurdan la vera nê kiştoxan bêveng manena.''

Gulîstane Mustafa pare kerd ke hêrişê îşxalî yê dewleta tirke wextê peyênî de zêdîyayê û vat: ''Nê hêrişî armanc kenê ke herême veng bikerê. Şarê Efrînî cara bi serran o kampan de xo ver dano. Ma rojêke do abigêrê Efrînî. Coka ma tim mîyanê xoverdayîşî de yê.''

Şemsîye Mihemed Omar vat: ''5 serrî yo ma Şehba de yê la dewleta tirke hêrişanê xo ra fek vera nêda. Dewleta tirke hema zî doman, cinî û kokiman qetil kena. Vera nê hêrişanê dişmenî ma pîya têgêrenê. Se beno wa bibo ma do herêma xo meteriknê.''