Keyeyanê gerîlayanê ke netîceya xayînîya PDKyî de şehîd bîyê ANFyî rê qisey kerd. 

Mustafa Ehmed (Hamît) dewa Qantarî ya Efrînî de, 1970 de dadîya xo ra beno, 1985 de têkoşînê azadîye şinasneno û 1988 de tewrê gerîlayan beno. Hamît Lubnan de Akademîya Mahsum Korkmazî de maneno û pawitişê Rayberê Şarê Kurdî Abdullah Ocalanî keno.

Hamît 1990 de agêreno Kurdîstan, wextêk Botan de maneno û dima herêmanê Zaxo û Heftanînî yê Başûrî de şarî rêxistin keno. 1997 de zî Garê de hêrişê hêzanê PDKyî de şehîd beno.

Kekê Hamîtî Nûrî Ehmedî da zanayene ke birayê ci domanîya xo ra hata wayîrê ruhêkê aktîvîstî bîyo û vat: ''Wexto ke şîyêne dibistane ey bire daye ke tewrê têkoşînî bibo. Ey 9 mengan Kampa Lubnanî de asayîşê Rayber Apoyî ard ca, dima şi welat. 1996 de ma dîmenê ey TV de dî, Zap de bi. Ma xêrê xalzeyê xo Rifatî ra têgêrayîş şinasna.

Roja ke xebera şehadetê ey amebî ez keye de nêbîya. Dadîya mi şîbî rehme, ma baxçe de tazîye na ro. A roje ma eşnawit ke birayê mi hetê keyeyê Barzanîyan ra ameyo şehîdkerdene. Hêrsê ma na xebere ra dima bi pîlêr.

Ma vatêne qey PDK têgêrayîşêko welatperwer o. Heta babîyê mi waştêne nameyê Hamîtî bikero Mustafa Mele Barzanî la karmendê nufusî qebul nêkerd. Xayînîya înan ra nêbîyêne nika rewşa ma ney ra cîya bibîyêne. Ê bîyê xizimkarê îşxalkeran. Keyeyê Barzanîyan Kurdîstan de sey keyeyê Erdogan û rejîmê Baasî yo.

PDKyî bi desan gerîlayî qetil kerdî, cenazayê înan vînî kerdî. Ma Sêmalka de hende çalakîyî kerdî la înan reyna zî cenazayê ma nêdayî. Ez venga nê xayînan dana ke wa ameyoxê domananê xo bifikirê. Şima do rojêke hesab bidê şarî. Ajan û xayînî do tarîxê Kurdîstanî ra bêrê vetene. Îşxalker û hemkarê înan do bin bikewê, serkewtiş do bibo ê ma.''