Keyeyanê gerîlayanê ke netîceya xayînîya PDKyî de şehîd bîyê ANFyî rê qisey kerd û waşt ke ganî vera na xayînîye têkoşîn bêro pîlkerdene.

 Rabîa Weqasa ke bira û warezayê ci hêrişanê xayînan ê PDKyî de şehîd bîyê qala înan kerde. Birayê Rabîa Weqas Nûrî Mustafa Weqas (Dêrsim Sîlvan) 1968 de dewa Kaxurî ya Efrînî de dadîya xo ra bîyo û 1991 de tewrê têgêrayîşê azadîye bîyo. Dêrsim 14ê teşrîna peyêne ya 1995î de Metîna de hêrişê PDKyî de şehîd bi.

warezayê Rabîa Arîf Xelîl (Dîyar) 1975 de Efrîn de dadîya xo ra bîyo û 1994 de tewrê têgêrayîşê azadîye bîyo. Dîyar 1997 de warê Kurê Jaroyî yê Zapî de pêkewtişê vera PDKyî de şehîd bi.

Rabîa pare kerd ke birayê ci Nûrî leşkerîye ra verî têkoşînê azadîye şinasnayo û vat: ''Birayê mi wendêne. Dima ke ey leşkerîye kerde vatêne do tewrê gerîlayan bibo. Ez, kekê mi, birayê mi û dezayê mi, ma ronişte bîyî. Înan vat 'Ma dişmenî rê leşkerîye nêkenê, kurdan rê kenê.' Ê pîya 1991 de tewrê têgêrayîşî bîyî. Tewrbîyayîşê Nûrîyî tesîrê embazanê ci û keyeyê ma kerd. Nûrî şehîdo verên ê keyeyê ma bi. Warezayê mi Arîf 1997 de şehîd bi. Nûrîyî serkêşîya keyeyê ma kerde. Şehadetê Nûrîyî ra dima kênaya apê mi zî tewra şorişî bîye. 

Birayê mi merdimêko zaf hol, qîmetîn bi. Wexto ke ma eşnawit o do tewrê şorişî beno babîyê mi tira vat 'Layîqê şorişî be. Ma pê şima sereberz ê. Vera dişmenî wayîrê kurdayetîye vejîyê. Şehadetê Nûrîyî tewr zaf tesîrê dadîya mi kerd. 

Warezeyê mi Arîf mi ra pîlêr bi la tim mi rê vatêne xalê. O meraqdarê kultur û hunerî bi. Ey rojêke waşt ke 'vera zulm û xayînîye' ma şîîran binusê. Bi hezaran kesî seba ke rêçê Dîyar û Dêrsimî de şorê sozî danê. Înan vatêne 'Şima do Kurdîstanî bivînê.' 

Zorê ma şîyo ke ê pê destê kurdan şehîd bîyî. Bi hezaran ciwanî destê înan de şehîd bîyî. Keyeyê Barzanîyan kam o ke hende gonîye rijneno? Êyê ke seba kurdayetîye çîyêkî nêkenê, ez înan rê nêvanê kurd. Ez venga ê kesanê ke rêçê Barzanîyan de şinê dana ke nînan bişinasnê û ê rêçî ra abigêrê. Ê do rojêke xayînîya xo de bixeniqîyê. Ma sey keyeyanê şehîdan rêçê şehîdan û şerwanan de yê.''