Keyeyê gerîlayanê rojawanijan ê ke pê destê PDKyî ameyî qetilkerdene ANFyî rê qisey kenê.

Kîbare Hebeş (Necbîre Koçer) dewa Tifle ya Efrînî de 1977 de dadîya xo ra bîya. Necbîre hema ke doman bîye nameyê Apogîran eşnawena û wazena tewrê gerîlayan biba. La seba ke hema doman a, Necbîre rê herême de wezîfeyê bînî dîyenê. Necbîre dima 1994 de tewra gerîlayan bena.

Babîyê Necbîre Mihemed Hebeşî wina qala kênaya xo kerde: ''A kênaya min a verêne bîye, zaf ercîyaye bîye û rik bîye. Eke çîyêk biwaştêne heta ke o kerdêne nêvindertêne. Cuya ci zî têkoşînê ci zî wina bi. Aye nimitkî ra kitabî wendêne, xo derheqê kurdayetîye û têkoşînî de aver berdêne. 

Necbîre tim waştêne tewra gerîlayan biba. A bi nê hewesî bîya gerîla. Aye ma ra nimitkî de serran xebatî kerdê. Wexto ke tewra gerîlayan bîye fotografê xo ma rê şawit. Ez bi kênaya xo sereberz a. Necbîre aşiqa kurdayetîye û Kurdîstanî bîye. Bekaa de dersê kurdkî dayêne. Rayberîye tira vato 'Ma to seba karanê rêxistinkerdişî şawenê Ewrpa.' La aye vato 'Ney, ez wazena şora koyanê Kurdîstanî.' 1994 de Garê de tewra gerîlayan bîya.

Ma eşnawit ke Garê de birîndar bîya û seba tedawî şîya şaristanî. 6 mengan ra dima reyna agêrena koyan. Peynîya 1997î de pa 29 embazanê xo, dafika PDKyî de Garê de şehîd bena. Hêriş de tay gerîlayî birîndar bibî. Ma ê ardî keyeyê xo de miqatê ci bîyî. 

Verî ma key vengê Barzanîyan bieşnawitêne keyfê ma ameyêne. Heta mi nameyê lajê xo kerd Mesûd. Eke ma bizanayêne ê wina kenê... Hînî nê şer û wehşetî rê bes o. Ê hêrişê gerîlayan kenê. Ez venga PDKyî dana ke wa abigêrê kurdayetîye ser.''