Keyeyê gerîlayanê rojawanijanê ke pê destê PDKyî ameyî qetilkerdene ANFyî rê qisey kenê.

Telcîye Hamo (Necbîre) 1975 de Efrîn de dadîya xo ra bîya. Necbîre hema ke doman bîye PKK şinasnena û 1994 de bena gerîla. 6 serran ra dima Necbîre netîceya hêrişê xayînan de ameye şehîdkerdene.

Dadîya Necbîre Fatma Xelîla 97 serre wina qala kênaya xo kena: ''A qerardar û jîhat bîye. Vera têgêrayêne û waştêne çîyêkî bikerê. Dima ke aye têkoşîn şinasna, bi israrî waşt tewra ci biba. Mi vatêne 'Ti hema qij a.' La aye vatêne 'Ez do mîyanê têkoşînî de bena pîle.' Roja ke mi xebera ci ya şehadetî girewta, a roje ra nata dejê ci ha zerrîya mi de ya. Kênaya min a delale hêrişê PDKyî de şehîd bîye. Têna Necbîre nê sey Necbîre bi hezarî... Înan dejê ewladî vist zerrîya bi hezaran dadîyan. Cenazayê domananê ma zî çin ê. Dadîyê kurdan do hesabê ney bipersê.''

Kekê Necbîre Murad Hamoyî zî îfade kerd ke waya ci çîyêkî ra nêtersayêne û vat: ''Cuya ma rind bîye la dişmenê kurdan nêverda. Serranê 90an de ez zî mîyanê xebatan de bîya. Rojêke embazî ameyî û înan vat 'Dewa şima ra di şehîdî est ê. Keyeyê înan kamca de yê?' Wexto ke înan nameyê waya mi vat ez xo ra şîya. Dadîya mi newe amelîyet bibî, hema weş nêbibî. Mi senî xeberêka winasêne bidîyêne. Zaf zehmet bi. Şehadetê aye ra dima rejîmê Baasî nêverda ma nefes bigêrê. Înan di reyî ez destbend kerda. 2 kênayê dadîya mi şehîd bîyê. Hînî vîrê ci çin o la reyna zî tewra çalakîyan û yadkerdişê şehîdan bena. Ma tewirê xayînî şermezar kenê.Ganî her kes vera nê tewirî têkoşîn bikerê.''