Vervatoxê Çapemenîya  Hêzanê Sûrîyeya Demokratîke (QSD)  Ferhad Şamîyî derheqê hêrişanê dewleta tirke û çeteyanê ci yê SMOyî de Channel 8î rê qisey kerd.

Şamîyî da pêhesnayene Tirkîya ekîbêkê MÎTî verê hêrişanê vera Awbendê Tişrînî û Pirdê Qereqozaxî war de ca kerdo û vat nika no ekîb destê QSDyî de yo.

Ferhat Şamî dewamê qiseykerdişê xo de nê vatî: ''Nika Şam û Heleb de xeylê kesê ke bi hewayêkê aktîfî têgêrenê eslê xo de mensûbê MÎTî yê. Destê ma de belge û vîdeoyî est ê. Bitaybetî hêrişanê vera Awbendê Tişrînî Pirdê Qereqozaxî de ekîbêkê MÎTî ca girewt. Nika no ekîp destê hêzanê ma de yo û ma do rojanê verê ma de dîmen û belgeyanê înan eşkera bikerê. Dewleta tirke hinî heme dezgehanê Sûrîye de eşkera ca gena. Sey waranê leşkerî û îstîxbaratî şîrketanê ekonomîkî, binawanîya telekomunîkasyon û înternetî de zî xo ramojnena. Bajaranê girdan ê sey Heleb, Humus û Hema de estbîyayîşê xo zêdînena. Tirkîya wazena ke Sûrîye hetê sîyasî, leşkerî û kulturî ra birgîro binê kontrolî.''