15ê êlula 2014î de cerganê DAÎŞî bi tank û topan hêrişê Kobanê kerdbi. Şarê Kobanê û şerwananê YPG-YPJyî bi hawayêkê tarîxî xo ver da û nêverda ke şaristan bikewo destê cerganê dişmenê merdimîye. Rojanê tewr krîtîkan ê xoverdayîşê Kobanê de Wayîrê Xelata Nobele zî tede xeylêk akademîsyen, roşnvîr, nuştox û hunermendan veng da û vengdayîşê înan ser o 1ê teşrîna peyêne sey Roja Kobanê ya Dinya ame îlankerdene.

Nê vengdayîşî ser o pêro hetê dinya ra merdiman kuçeyan de paştî daye xoverdayoxanê Kobanê.

Endamê Komîteya Gazîyanê Kobanê Îsmaîl Mihemed vist vîrî ke wexto ke Kobanê de şer dest pêkerd, endamê xeylêk organanê çapemenîye serê sînorî de kom bîyî û vat: ''Înan waştêne nê şerî belge bikerê. La înan waştêne serkewtiş nê binkewtişê Kobanê belge bikerdêne û dersêke bidayêne şaranê dinya. Pêro dinya o çax dî ke dewleta tirke serê sînorî de senî paştî daya cerganê DAÎŞî. La xoverdayîşê Kobanê mojna pêro dinya ke şarêko wayîrîrade senî eşkeno xo ver bido. Xoverdayîşî ra dima pêro dinya ra bi seyan merdiman waşt ke xo biresnê Kobanê. Bi seyan kesî şehîd bîyî. Her ke cergan waşt Kobanê bênefes verdê xoverdayîşê Kobanê hîna bi pîlêr.

Kobanê bi yewîya xoverdayoxan ameye xelisnayene. Kobanê de o çax têna kuçeyêk ma destî de mendbi. Ma bi îradeyê xo ê kuçeyî ra dest pêkerd û xo resna Bahozî. Xoverdayîşê Kobanê seba pêro dinya bi çimeyê îstîfadekerdişî û seba şaranê azadîperestan û şaranê bindestan bi hêvîya xoverdayîşî. Roja Kobanê ya Dinya netîceya îrade, kede û xoverdayîşêkê pîlî ya. Ma Roja Kobanê ya Dinya dîyarîya Rayberê felsefeya xo kenê.''

Ciwan Azado ke Reqa ra yo û 2012 de endamê Yewîya Wendekaranê Kurdîstanî (YXK) bi, wextê hêrişanê DAÎŞî de verê xo dayo Kobanê û birîndar bîyo. Ciwan Azadî îfade kerd ke çar hetanê Kurdîstanî ra cinî, ciwan, kokim û domanî wayîrê Kobanê vejîyayî û vat: ''Nê xoverdayîşî planê DAÎŞî pûç kerdî. 13 hezar cergê DAÎŞî Kobanê de bin visîyayî. Coka 72 welatî weçare mendî ke paştî bidê QSDyî. Xoverdayîş û îradeyê şarê kurdî kerd ke koalîsyon paştî bido QSDyî.

Seba ke ma projeyê Rayber Apoyî pêro dinya rê bidê şinasnayene ma do têkoşînê xo rê dewam bikerê. Eke dewleta tirke ewro wina bêperwa hêrişê Îmraliyî kena, çekanê kîmyewîyan vera  gerîlayan şuxilnena no nîşaneya tengîya ci ya vera têkoşînê kurdan a.''