Hemsereka Meclîsê Rayberdişî yê Îdareyê Xoserî yê Rojawanî Bêrîvane Xalid derheqê hêrişanê dewleta tirke yê vera Rojawanî yê ke 19ê kanûne ra nata yenê domnayene de, ANFyî rê qisey kerd.

Bêrîvane Xalid vist vîrî ke destpêkerdişê Şorişê Rojawanî ra nata dewleta tirke hêrişê Rojawanî kena û vat: “ Hêrişê dewleta tirke yê vera herême rojêke zî nêvîndetî. Efrîn, Girê Sipî, Serêkaniyê, Cerablus, Bab û Ezaz ameyî  îşxalkerdene. Pê hêrişanê ke dewam kenê wazenê waranê îşxalî hîra bikerê. Çi heyf ke herêma ma reyna bi tehdîtanê îşxalî yê dewleta tirke rî bi rî ya û bombarduman dewam keno. Dewleta tirke  û çeteyê ci Rojawan de sûcê şerî kenê. Vera şarê herême polîtîkaya îmha û qirkerdişî yena domnayene. Pê nê hêrişan wazenê şarê ma bitersnê û herême bikerê veng. ”

Hemsereke Bêrîvane Xalid bale ante bêvengîya mîyanneteweyîye ya vera hêrişan ser û wina dewam kerd: “Qirkerdişê Dêrikî de 11 sîvîlî ameyî qetilkerdene la vera nê nêrazîbîyayîş zaf sist mend. Ma herême û dinya belayê DAÎŞî ra xelisnayî. Înanê ke vera DAÎŞî têkoşîn kerd, ewro raştê hêrişê dewleta tirke û DAÎŞî yenê la rayapêroyîya mîyanneteweyîye nêrazîbîyayîşo ke hewce keno, nêdana. Ganî hêzê mîyanneteweyîyî vera têkoşîn û fedakarîya Rojawanî wina bêveng nêmendayêne. Seba ke herême û dinya terorê DAÎŞî ra bixelisnê bi hezaran kesan ganê xo feda kerd. Cewabê na fedakarîye, ganî bêvengîye nêbo.”

Bêrîvanê Xalid vat: “Şarê ma vera hêrişan bêveng nîyo û nêrazîbîyayîşê xurtî mojneno. Şarê kurd, ereb, tirkmen, suryanî, armenî û çerkesî bi hewayêkê qerardarî wayîrê Şorişê Rojawanî vejîyeno û herême paweno. Ma sey îdareyê xoserî tewirê xo eşkera mojna. Ma do destur medê ke çew destê xo destketeyanê şehîdan û şorişê ma rê derb bikero. Ma do şiroşê xo biresnê serkewtişî û no do semedê Sûrîye bibo modelêk. Ma do pêro pîya nê hêrişan betal bikerê. Ganî rayapêroyîya dinya wayîrê Rojawanî vejîyo. Dewleta tirke têna herême nê, wazena Sûrîye zî bifîno dest. Ganî hinî her kes vera dewleta tirke vengê xo berz bikero.”