Hukmatê Anqara 3yê nîsana 2023yî de warê hewayî seferanê teyarayan ê Silêmanî rê qefilnabî, 7ê nîsane de zî bi droneyanê çekdaran hêrişê Meydanê Teyarayan ê Silêmanî kerdbi. Dewleta tirke ya îşxalkera ke eşkena hêrişê her cayê Başûrî bikera, verî zî Silêmanî de sivîlî kerdbî hedef.

Hemsereka TEV-DEMî Rûkene Ehmed hêrişê vera Meydanê Teyarayan ê Silêmanî ANFyî rê ercna.

Rûkene Ehmed ard ziwan ke tesadûf nîyo ke no hêriş wextê pêvînayîşanê mabênê Qamişlo û Silêmanîyî de qewimîyayo û vat: ''No hêriş wextê pêvînayîşan û xîretanê serê yewîya neteweyîye de qeiwîya. Zîyaretê Rojawanî yê Serekê YNKyî Bafil Talebanî bi bingeyê ney. Mabênê Silêmanî, Qamişlo û Amed de şîyayîş-ameyîşî est ê. Bi taybetî herêma Silêmanî seba cigêrayîşanê yewîya neteweyîye cayêko girîng o. Hedefkerdişê Silêmanî hedefkerdişê yewîya neteweyî yo. Înan waşt verê xebatanê yewîye bigêrê. Reyna armancê nê hêrişî no bi ke weçînayîşanê 14ê gulane rê tesîr bêro kerdene û hêzê ke vera DAÎŞî şer de bîyê, bêrê çinkerdene.''

Rûkene Ehmed PDK hişyar kerde ke o wazeno hêrişê vera kurdan meşrû bikero. Rûkene Ehmed vat: ''Ma eşkerayîyanê PDKyî yê serê hêrişanê dewleta tirke raşt nêvînenê. Ma reyna înan hişyar kenê. Şarê ma yê Başûrî, bi taybetî şarê Silêmanî hîsger o. Ê zanenê ke no hêriş yeno manaya çî û armancê ci çita yo.''