2022 de dewleta tirke ya îşxalkere hêrişanê xo yê vera Rojawanî rê bêmabên dewam kerd. Goreyê doneyanê Komeleya Heqanê Merdiman a Herêma Cizîre hêrişanê dewleta tirke de 2022 de 21 domanî ameyî qetilkerdene, 57 domanî birîndar bîyî. Herêma Efrînî û Kampa Holî de zî 17 cinîyî ameyî qetilkerdene. Efrîn de 9 cinîyî ameyî remnayene.

Îdarekaranê Komeleya Heqanê Merdiman ra Evîne Cuma ANFyî rê qisey kerd. Evîne Cuma ard ziwan ke armancê komele belgekerdişê kerdişanê vera heqanê merdiman û pêşkêşkerdişê nê belgeyan o. Evîne Cuma vat: ''Emser ma nêeşkayî pêro belgeyan kom bikerê. Ma rê zehmet bi ke xo biresnê herêmanê îşxalkerdeyan. Aktîvîstê ke şinê ê cayan raştê îşkence û gefan yenê. No raporê Neteweyanê Yewbîyayeyan de zî ame îfadekerdene. Ma belgeyê ke arê dayê pêşkêşê Komeleya Heqanê Merdiman a Sûrîye, Dezgehê Çimdarîya Heqanê Merdiman a Sûrîye (SOHR) û Human Rights Watch (HRW) kerdî. Ma armanc kerd ke nê belgeyan biresnê cayê ci.''

Evîne Cuma îfade kerd ke înan emser 5 dosyayî amade kerdî û do înan pêşkêşê dezgehanê mîyanneteweyîyan ê eleqedaran bikerê. Evîne Cuma vat: ''2 binpaykerdişê heqanê merdiman ê Efrînî, Kobanê de birîndarkerdişê 11 sivîlan, xesarê vera malanê sivîlan, hêrişê vera merkezêkê perwerdeyî û qetilkerdişê 5 kênayan, birîndarbîyayîşê çar domanan; ma nê pêroyî belge kerdî, agahîyî ardî pêser û bierşawê dezgehanê mîyanneteweyîyan. 

Heta nika derheqê binpaykerdişanê herême û cayanê îşxalkerdeyan de asta mîyanneteweyîye de birêka cidîye nêameya girewtene. Nê hêrişî bi xirabî tesîrê herême kenê. Ganî vera nê sûcanê şerî yê dewleta tirke gamêka pozîtîfe bêra eştene.''