Hesen: Dewleta tirke ha bin kewena

Meclîsê Şarî yê Reqa ra Cîhat Hesenî pare kerd ke rixmê hêrişanê dewleta tirke zî şar Rojawanî nêterikneno û vat: ''Xoverdayîş û israrê şarî mojnenê ke sîyasetê dewleta tirke ha bin keweno.''

Hemserekê Komîteya Xebatanê Warê Komelkî yê Meclîsê Şarî yê Reqa Cîhat Hesenî derheqê hêrişanê îşxalî yê dewleta tirke yê vera Rojawanî de ANFyî rê qisey kerd.

Hemserek Hesenî da zanayene ke dewleta tirke tim dişmenîya sîstemê demokratîkî yê Rojawanî kerda û destpêkî ra nata hêrişê şorişî kerdêne. Hesenî vat: ''Sîstemê ma qetî pê dewleta tirke nêşi. Dewleta tirke wexto ke babete bena kurdî hîna bena hêrişker. Her ke şoriş bi pîl hêrişê dewleta tirke zî bîyî hîra. Nika zî dewleta tirke reyna pê îşxalî herême tehdît kena.''

Cîhat Hesenî bale ante ser ke dewleta tirke bi xo hêrişê Taksîmî serûber kerdo û bi nê hawayî zî zemînê îşxalî amade kerdo. Hesenî vat: ''Dewleta tirke verî zî kerbi ke pê komployan îşxalê xo meşrû bikero. Kobanê destpêkê Şorişê Rojawanî yo û tede cergê DAÎŞî ameybî binvistene. Hêrişê Taksîmî de dewleta tirke nameyê Kobanê girewtbi xo fekî, no zî a raşte her çî eşkera keno. Dewleta tirke kena ke Kobanê îşxal bikera.''

Cîhat Hesenî pê hesna ke dewleta tirke bi destûrê warê mîyanneteweyî û bi firsendê şerê Ukrayna-Rûsya hêrişê herême kerdo. Cîhat Hesenî dîyar kerd ke şarê Rojawanî rixmê nê hêrişan zî do qetî erdê xo meterikno û vat: ''Şarî tim pê xoverdayîşî cewab da hêrişanê dewleta tirke. Ewro zî rewşe wina ya. Xoverdayîş û israrê şarî mojnenê ke sîyasetê dewleta tirke ha bin keweno. Dewleta tirke armanc kena ke herême veng bikera coka dest erzena pêro kayanê gemarinan. No şer vera estbîyayîşê şarê kurdî yo.''