Hemserekîya Konseya Rayberdişî ya KCKyî seba Sirri Sureyya Ondero ke servîsê ciewnîyayîşê giranî de yo mesajêk weşana. Mesaj wina yo:

‘’Endamê Heyetê Îmraliyî û Serekwekîlê Meclîsî Sirri Sureyya Onder netîceya nêweşîya qelbî de wedarîyayo nêweşxaneyî û 12 saetan amelîyat de mendo. Heyf ke doktoran vato ke weşîya ci hema binê tehlukeyî de ya. Ma na xebere bi xemgînî eşnawite. Ma ey rê şîfaya xeyrîne û pêro heskerdoxanê ey rê sebr wazenê. Onder hem bi têkoşînê xo yê sosyalîzm û demokrasîyî hem zî bi xebatanê xo yê huner û fikrîyî komelî de cabîyo. Ma hêvî kenê ke o bêro xo ser, weş bibo û xebatanê xo rê dewam bikero. 

Nê prosesî de ke çareserîya sîyasî ya meseleya kurdan ancî rojdem de ya rewşa Ondero ke wayîrê rolêkê stratejîkî yo, zaf girîng o. Çunke birêz Onderî seba averberdişê nê prosesî zaf kede daye. Êyê ke terefgîrê haştî û demokrasîyî yê ganî xîretanê Onderî hîna hol fam bikerê û seba averşîyayîşê prosesî mîyanê xîretanê cesuran de cabigêrê.

Seke doktoranê ey vato serebûtê weşîye yê Onderî çîyêko normal nîyo. Eke ma rolê Onderî yê seba nê prosesî bîyarê verê çimanê xo ganî bi şikdarî nêzdîyê ney bibê. Çunke hêzê ke dûştê haştîye û demokrasîyî yê est ê. Ma wazenê ke seba ke nê şikî bêrê çinkerdene û rewşe bêra zelalkerdene xebatî bêrê kerdene. Çunke Rayber Apoyî zî pêvînayîşê xo de bale antibî rewşêka muxtemele ya winayêne ser û waştibi ke her kes baldar bibo. Coka ganî na rewşe bêra cigêrayene.

Xîretê ma yê seba serkewtişê prosesê Vengdayîşê Haştîye û Komelê Demokratîkî yê Rayber Apoyî do dewam bikerê ke Onderî zaf kede dabî ci. Seba erjo ke ma danê Onderî û seba bawerîya ke ma bi Rayber Apoyî kenê ma do xîretanê xo rê dewam bikerê. Ma ancî seba Sirri Sureyya Onderî şîfaya xeyrîne wazenê.Zerrîya ma bi Sirri Sureyya Onderî ya.’’