Sey her ca Kobanê de zî şar vera hêriş û gefanê dewleta tirke pawitişê komelkî de yo.Destpêkerdişê Şorişê Rojawanî ra dima komun awan bi û çarçewa xopawitişî de Hêzê Pawitişê Komelkî (HPC) hezîrana 2015î de vera hêrişanê cerganê DAÎŞî ameyî awankerdene. Hêzê Pawitişê Cinîyan zî bi heman armancî Kobanê de ameyî awankerdene. HPCyî ra Osman Xelîlî û Hêzanê Pawitişê Cinîyan ra Şukrîye Muslîm qala karê xo kerde.

Osman Xelîlî vat: "Mesela hêrişan bi xorêxistinkerdişê komelî çareser bena. Dewleta tirke şaristanê ma îşxal kerdî, vêşnayî, doman û cinîyî qetil kerdî, her çî talan kerdî. Verê çimanê komelî de nê kerdişê xo kerdî. Vera nînan beşêkê komelê ma seba pawitişî dest eşt çekan. Ma têna seba pawitişê şar, mal û erdê xo xo rêxistin kenê."

Şukrîye Muslîm dadîya hîrê domanan a. Şukrîye Muslîm serra 2015î ra nata Hêzanê Pawitişê Cinîyan de ca gêna. Kênayêka aye zî YPJyî de ya. Şukrîye Muslîm vat: "Pawitişê şarî seba ma zaf girîng o. Vera ma gef û hêriş estê. Vera nê hêrişan ma sey her beşê komelî pawitişê komelkî pîl kenê. Ma dişmenan ra nêtersenê. Bi qetilkerdişê cinîyan wazenê ma bêveng bikê. Şehîde Hevrîne, Barîne, Avesta, Amara û zaf cinîyê bînî mojnenê ke ma nêtersenê. No erd bi gonîya şehîdan ame awdayene. Nê erdî se ro zerrîyê pêro dadîyan vêşayî. Dadîyî do nê erdî cergan rê nêverdê. Ma do heta peynîya çilka gonîya xo erdê xo bipawê."