Nûjîyan Çirav 2015 de tewra Şorişê Rojawanî bîye, vernîya refanê şorişî de cagirewt, Bab de lingê ci tira qerifîya la hema zî a bi xîretêkê pîlî têkoşînê xo rê dewam kena.

Wexto ke Nûjîyane resabî Kobanê, tay dewî hema zî binê îşxalê DAÎŞî de bîyî. Nûjîyana ke azadkerdişê dewan de cagirewto hêverî şîye dewa Şikeyfî. Şikeyf de mesafeyêka nêzdîye ra aye DAÎŞ de şer kerd.

Nûjîyane wina qala pêkewtişanê Şikeyfî kena: ''Ma sey 8 embazan şîyî dewe. Çar hetê dewe girewte bîyî. Cepheyê peyî de ma cergî girewtî mîyanê çemberî. 6 saetan, 10 metre ra ma da cergan ro. Her ke pêkewtişî dewam kerdêne ma hîna bîyêne nêzdîyê cergan. Ez embazan ra kewta dûrî. Ma 5 embazî mend bîyî. Embaz Cûdî birîndar bi û embaz Goran zî wexto ke şîyêne hewarê Cûdîyî birîndar bibi. La peynî de ma ser kewtî, dewe azad kerde û 26 cergê DAÎŞî kiştî.''

Nûjîyane dima embazanê xo reyde verê xo dana dewa Tişrînî. Nûjîyane vana: ''Ma resayî Tişrînî û pêkewtişan dest pêkerd. 32 cergî est bîyê. Wesayîto bombabarkerde ver bi ma ameyêne. Ma giro tewr stratejîk vistbi destî. Ma awbendê Tişrînî DAÎŞî ra pakî kerd. Hemleya Minbicî ra destê ma hîna bi qewetîn. Hemle ra dima zafê cergê DAÎŞî derbazê Babî bîyî. Bab hînî bibi merkez.

Ma sey çar embazan verê xo da Babî, dewa Erîmanî. Ma çar embazan wexto ke planê hêrişî kerdêne raştê hêrişê çekan ê giranî ameyî. Ma yewbînan ra cîya bîyî, toz û dû ra nêeşkayî çimanê xo abikerê. O çax mi lingê xo de yew dej hîs kerd. Wexto ke mi çimê xo akerdî lingê mi hetêk de bi, ez hetêk de bîya. Ez tersa ke lingê xo hînî nêvîna. Mi xo erdî ra kaş kerd, lingê xo girewt û kerd serê zanîya xo. Heta ez biresa Kobanê lingê mi verarê mi de bi. Amelîyatî ra dima mi dî ke lingê mi verarê mi de nîyo. Mi bi israrî lingê xo waşt. Hînî ganî mi tira xatir biwaştêne. Domanîya mi de vajîyayêne ke eke ling sipî û pak bibo çew şino cenet la eke sîya û lêşin bibo çew şino cehenem. Ez xo bi xo hûyaya.

Di rojan ra dima seba Şehîde Roza Kobanê de merasîm est bi. Dejê mi zaf bîyî la ez reyna zî şîya şehîdgehî. Serê mi de yew tîşort û îşlîg est bi. Embazan mi rê îşlîgê mi waşt. Ez şaş bîya. Dima înan lingê mi kerd mîyanê îşlîgî û pê embaze Roza defin kerd.

Mi tim aqîbetê lingê xo meraq kerdêne. Hînî lingê mi û embaze Roza cenet de yê.''