Koçberê ke îşxalê dewleta tirke yê vera Rojawanî de neçare mendî ke koç bikerê Reqa de mîyanê şert û mercanê zoran de kampan de manenî. Meclîsê Sivîlan ê Reqa venga koçberan da ke koçberî koçê kampanê eşkerakerdeyan bikerê.
Îşxalê dewleta tirke yê vera Rojawanî ra semed Reqa de zaf kampî ameyî ronayene. Hûmara kampanê Reqa bîye 20î ra zêdêr. Koçberî nê kampan de xeylêk zorî ancenê. Dezgehanê hetkarî yê mîyanneteweyan heta nika hetkarîya kampan nêkerde.
Koçberanê ke bi ameyîşê zimistanî zorîyanê pîlan ancenê tewirê dezgehanê hetkarîye yê mîyanneteweyan rexne kerd.
Koçbera bi nameyê Hena El Elî vat: "Ma nêeşkenê abigêrê keyeyanê xo. Çunke rejîmê Îranî û Sûrîye keyeyê ma kerdî baregeh."
Koçbera bi nameyê Eyşê Mişel vat: "Kampe de zaf nêweşî estê. Zaf reyî domanî benê nêweş. Kesêk berpirsîyarîya koçberan nêgêno xo ser û dermanê hewcedarî nênê peydakerdene."
Koçberêka bîna Fatima Îsa zî îfade kerd ke koçberî kampe de têkoşînê ciwîyayîşî kenê.
Hemserekê Komîteya Xebate û Karanê Komelkîyan a Meclîsê Sivîlan ê Reqa Abdulselam Hemsorkî zî da zanayene ke kampe de 14 hezarî ra zêdêr koçberî estê.
Meclîsê Sivîlan ê Reqa venga koçberanê ke kampanê bînan de manenê da ke pêro koçberî bêrê kampanê Girê Sipî ke hem Meclîsê Sivîlan hem zî dezgehê mîyanneteweyî hetkarîya înan bikerê.
