Endamê Konseya Hemserekîye ya PYDyî Salih Muslimî cewab da persanê ANFyî. 

Muslimî bale ante ser ke Sûrîye de 12ê adara 2004î ra nata şer û alozîye est ê û Rojawan serra 2011î ra nata prosesê xo îdare keno. Muslimî vat: ''Dewleta tirke serkêşîya dişmenîya vera kurdan kena. Dewleta tirke 1923yî ra nata xîret kena ke Sûrîye îşxal bikera. 7 serrî yo dewleta tirke pê metod û rayîranê cîyayan seba ney xebitîyena. Muxatabê ma rejîmê Sûrîye yo la rejîm sey ma nîyo, haştîye nêwazeno. Rewşa mabênê Ukrayna-Rûsya senî ke tesîrê pêro dinya keno do tesîrê Rojawanî zî bikero. Seba ke zêdêr tesîrê ma nêkero, ma tedbîranê xo gênê. Eke vera ma hêrişêk bêro kerdene xora ma do xo bipawê. Sûrîye de çareserîye hetêkî ra pabesteyê hêzanê mîyanneteweyîyan o zî.''

Muslimî vist vîrî ke Forumê Dîplomasî yê Antalya de hukmatê tirkan û PDKyî pêvînayîşî kerdî û venga PDKyî da ke sewqîyatê leşkerî yê ver bi Heftanînî vindarno. Muslimî vat: ''Şar eşkeno pê metodanê demokratîkan verê xîretê PDKyî bigêro. Çunke gerîlayî domanê pêro Kurdîstanî yê. Tirkîya Başûr de hêzêko îşxalker o û wazena statuyê Başûrî çin bikera. Ganî Başûr goreyê ney pozîsyonê xo dîyar bikero. Forumê Antalya parçeyêkê nê dek û dolaban o.''

Muslimî ard ziwan ke bê Têgêrayîşê Azadîye û Abdullah Ocalanî Rojawan de çareserîye mumkîn nîya û vat: ''Ganî rewşa Ocalanî hol bêra ercnayene. Hêzê ke Rayber Apoyî esîr gênê wa bizanê ke seba çareserîya meseleyan ganî ey vera bidê. Ez hêvî kena ke Newroze seba ney do biba destpêk. Ma prosesêkê hesasî de yê. Pêro dinya û dormeyê ma mîyanê adirî de yê. Ma kamyew aste de bibê yew ma do a aste de kêm zerar bivînê.''