Fermandaranê QSDyî ra Newroze Ehmed vat: ''Badê azadkerdişê Baxozî ke kelaya peyên a DAÎŞî bî, têkoşîn kewt merhaleyêka newî. 285î ra zafêr hucreyê rakewteyî yê çeteyan ameyî destfînayene, 397ê înan merde 2 hezar û 323 çeteyê DAÎŞî ameyî tepiştene.
Fermandaranê QSDyî ra Newroze Ehmed bi wesîleya serrgêra çarin a serkewtişê Baxozî ANFyî rê qisey kerd û têkoşînê vera DAÎŞî erjna:
''Ma wextê tarîxî ra ravîyarene, çunke nê tarîxî de xîlafetê DAÎŞî ame qedînayene. Bi nê serkewtişê wisarî, wisarêko bîn ame afirnayene. Ma şehîdanê xo ke no serkewtiş ma rê da ciwîyayene, bihurmet û mînetî yad kenê. DAÎŞ bin kewt la hema herême de hucreyê ci yê rakewteyî est ê. Vera nê çeteyan operasyonî dewam kenê. Badê Baxozî xeylêk çeteyî ameyî tepiştene. Têkoşînê ma bi metodanê cîya cîyayan dewam kerd. Tehluke hema nêqedîyayo. Serkêşîya hêzanê ma yê îstîxbaratî de pîya bi QSD û Hêzanê Asayîşê Zereyî têkoşîn dewam keno.
Goreyê îstîxbaratê ke kewtê destê ma Kampa Holî, Til Berak, Til Hemîs, Reqa, Derazor, Tebqa, Sirîn û cayanê bînanê ke DAÎŞî xo tede rêxitin kerd, ma operasyonî kerdî. Bitaybetî badê hêrişanê vera Sekêkanîyê û Girê Sipî çeteyanê DAÎŞî hêrişanê vera zîndananê Hesekê, Sînaa û Reqa hêrişî girdî kerdî. Nê demî de 352 hêrişê terorî yê DAÎŞî ameyî kerdene. Netîceya operasyonanê Koalîsyonê Mîyanneteweyî û Hêzanê Asayîşê Zereyî de 397ê înan merde 2323 Çeteyê DAÎŞî ameyî tepiştene.
Pîya bi operasyonanê peyênan humara çeteyanê DAÎŞî ke herême de tepişteyî 10 hezîra zafêr bîye. Çeteyê ke Baxoz de ameyî tepiştene zî hema tîya de yê. 60 welatan ra çeteyî est ê. Seba ke çeteyî merê remnayene û xo newe ra rêxistin mekerê 2023 de ma xeylêk operasyonî kerdî. Seba ke herême de hêzê bînî est ê , rewşa ekonîmîkî û xeylêk sebebanê bînan ra tehdîdê newe ra ganîbîyayîşê DAÎŞî est o.
Sey QSD û Îdareyê Xoserî barê ma yo tewr giran çeteyê tepişteyî yê DAÎŞî yê. Çunke zîndanê herême zixm nîyê. Mesrefê çeteyan zî milê ma de yo. Koalîsyonê Mîyanneteweyî têna se ra des nê barî geno xo ser. Dezgehê Mîyanneteweyî badê Zîndanê Sînaa bêrê herême zî hetkarîya qîmkerdîye nêkerde. Çîyo ke hewce keno wa her dewlete hemwelatîyanê xo bêro cayê xo. Gerek mehkemeya mîyanneteweyî bêro ronayene. Zafê çeteyan iraqij ê. Iraq reyde muzakere ame kerdene la zaf giran têgêrenê.
Xora herêma ma tim binê bombardumanî de ya coka tîya tepiştişê çeteyan zehmet o. Seba ke çeteyê tepişteyî bişawîyê welatanê înan zaf kombîyayîşî yenê kerdene la qîm nêkenê. Her kes zano ke dewleta tirke hamkara DAÎŞî ya. Xora çîyê ke herêmanê îşxalkerdeyan ke yenê kerdene ferqê înan û kerdişanê DAîŞî çîn o. Wezîfeyê QSDyî yo verên oyo ke nê herêmanê binê îşxalî azad bikero.''
