Endama Fermandarîya Pêroyî ya QSDyî Newroze Ehmed bi wesîleya serrgêra azadkerdişê Baxozî ANFyî rê qisey kerd.

Newroze Ehmed da zanayene ke azadkerdişê Baxozî 2019 ra nata herême de Koalîsyonê Mîyanneteweyî reyde operasyonê înan dewam kenê. Newroze Ehmed vat: ''Vera herême zaf hêrişî yenê kerdene. Wextê verî de Koalîsyonê Mîyanneteweyî yê Amerîka, Îngilîstan û Fransa ray kar kerd la ney qîm nêkerd. Têkoşînê ma bi her hawayî dewam keno. Xora eke ooperasyon û xîrerê ma ra nêbîyêne DAÎŞî newe ra gefî werdêne.  

Herêmanê îşxalkerdeyan de DAÎŞ aktîf o. DAÎŞ nê cayan de xo rêxistin keno, perwerde vîneno û plananê hêrişan keno. Ebûbekîr Bexdadî ra dima Abdullah Kardaş zî uca de kişîya. Mesuldarê DAÎŞî pêro ê herêman de ca bîyî. Îdareyo Xoser bi îmkananê xo yê kêman têna verdîya. Îdareyo Xoser paştdayîşêkê qîmî nêvîneno ke vera DAÎŞî netîceyêka qetî bvisno destî. Sey Kampa Holî tay herêmî est ê ke nê herêmî zaf tehlukeyîn ê. Sey dewleta tirke tay hêzî seba nê cayan vanê 'Kampa sivîlan a.' Êyê ke wina vanê paştî danê DAÎŞî.

Hêrişê vera Hesekê ra dima xeylêk babetî ameyî nîqaşkerdene labelê caardişê înan de qelsî û peygoşîye est a. Çunke paştdayîş kêm o. Bi hezaran tepişteyî est ê, Zîndanê Sinaa qîm nêkeno. Îmkanê ma yê madîyî zî nêvejîyenê. Welatê ke hemwelatîyê înan mîyanê DAÎŞî de yê paştî nêdanê ma. Ganî na herême bêra pawitene. Hende tepişteyî, keyeyê DAÎŞî, domanê DAÎŞî yenê manaya artêşêka pîle. No seba pêro dinya gef o. Ganî pêro mesuldarî goreyê ney erkê xo bîyarê ca. Ma hewceyê paştdayîşê madî, sîyasî, manewî, leşkerî ûsn.

Hêrişê vera Hesekê ra dima operasyonê ma dewam kenê. Hem vera DAÎŞî hem zî vera paştgîranê xo ma operasyonan kenê. Reyna paştdayîşê MÎTî yê bi DAÎŞî nê hêrişî de eşkera bi. DAÎŞî bi heman armancî hêriş kerd. Hêrişê dewleta tirke zî nêvindenê. Pêro hêzê ma bi hîsgerî têgêrenê. Hem komel hem zî ma. Seba pûçkerdişê nê xîretan têkoşînê ma dewam keno. Ê nêeşkenê waştiş û îradeyê ma bişiknê.''