Endama Fermandarîya Pêroyî ya QSDyî Newroze Ehmed derheqê hêrişanê îşxalî yê dewleta tirke yê vera Rojawanî û têkoşînê QSDyî de ANFyî rê qisey kerd.

Newroze Ehmed bale ante ser ke dewleta tirke ya îşxalkere şerê Ukrayna-Rûsya xo rê kerd firsend û hêrişê Rojawanî kerd. Newroze Ehmed vist vîrî ke dewleta tirke bi bahaneya madeya 51. ya Neteweyanê Yewbîyayeyan (NY) vana ê 30 kîlometre sînoranê xo pawena la qasê 60 kîlometre kewta zereyê Rojawanî.

Newroze Ehmed vat:

''Dewleta tirke Rojawan de sivîlan kena hedef, qirkerdişan kena. Reyna dewleta tirke binawanîya şaristanan, bînayanê xizmetê komelkî, waranê petrol û sotemenî kena hedef. Dewleta tirke bi nê hawayî kena ke şar koç bikero. Dewleta tirke bêvengîya rayaumûmîya mîyanneteweyîye ra hende hêrişê xo giran kerdî.

Dewleta tirke hêrişê xo giran kerdî. Nika dewleta tirke game bi game aver şina û wazena peynî de pêro herême îşxal bikera. Ma vera hêrişanê sererdî yê muxtemelan amadekarîya xo kerde. Şarê ma zî wa amade bibo. Hêrişanê dewleta tirke ra zaf hêzê sey DAÎŞî wazenê bêrê xo ser û herême de serdest bibê. Sey hêzanê leşkerîyan amadekarîyê ma xurt ê. Ma wayîrê tecrubeyan û moralî yê. Şarê ma zî sey ma bingeyê Şerê Şarî yê Şorişgêrî de têgêreno. Hînî şar û hêzê ma   bîyê yew. Senî ke ma hêrişanê sey Zîndanê Sînaa de şarê xo reyde têgêrayî ma vera nê hêrişan zî şarê xo reyde têbigêrê. Ma her wextî ra hîna bihêz ê. Yewîya şar û hêzanê leşkerîyan do hêrişan pûç bikera.

Tirkîya endama NATOyî ya û Tirkîya pê çekanê NATOyî hêrişê ma kena. Bê destûrê NATOyî nê hêrişî yenê kerdene. Paştdayîşê NATO û hêzanê mîyanneteweyîyan ê bînan hêz dano dewleta tirke. Dewleta tirke ha erdê ma de sivîlan qetil kena la vera ci bêvengîyêka pîle est a. Seba ke dewleta tirke hêrişanê xo hîra mekera karê ma yê dîplomatîkî dewam kenê. Nê hêrişî têna vera Rojawanî nê vera pêro Sûrîye yê. Leşkerê Şamî nê hêrişan de merdî. Ganî hukmatê Sûrîye û dewletê erebî zî vera nê hêrişan vinderê, tewirêkê xurtî bigêrê. Heta nika ne rejîmê Şamî ne zî welatanê ereban vera nê hêrişan nêrazîbîyayîşê xo xurtî ra nêmojnayo.

Dewleta tirke asayîşê Kampa Holî ya ke tede cerg û keyeyê DAÎŞî manenê, û asayîşê hêzanê ma yê zîndananê DAÎŞî kena hedef. Reyna baregehê ma û Koalîsyonê Mîyanneteweyî kerd hedef. Dewleta tirke qestî ra nê hêrişan kena û wazena DAÎŞî gandar bikera. Dewleta tirke mudaxeleyê têkoşînê vera DAÎŞî kena. Eke hêrişî wina dewam bikerê ma nêeşkenê vera DAÎŞî têkoşîn bikerê. Ma heta peynî xora erkanê xo bîyarê ca. La binê nê şertan de pawitişê Kampa Holî zehmet o. Kampa Holî de heta nika 8 şerwanê ma şehîd bîyî. Ma reyna xîret kenê ke kampe binê kontrolê xo de bitepişê. La eke hêrişî hîna giran bibê no pawitiş do bibo zehmet. Eke wina dewam bikero DAÎŞ newe ra gandar beno û sey verî beno bitehluke. Coka ma qerqilîyenê û pêro dinya rê vana ke vera nê hêrişan tewir bigêra. Pawitişê Rojawanî têna erkê ma nîyo erkê pêro dinya yo. Wa pêro dinya mesuldarîya xo bîyara ca.

Şarê ma çimeyê moral û hêzê ma yo. Şarê ma hol zaneno ke vera hêrişan xo senî bipawo û senî wayîrê erdê xo vejîyo. Şarê ma heta nika mesajê xoverdayîş û têkoşînî zî bi zelalî dayî. Ma kenê ke bibê layîqê şarê xo û sozanê xo bîyarê ca.

Ez tewirê şaran û dostanê ma yê ke bi şîarê 'Ma Rojawanî, Kobanê bipawê' vejîyayê meydanan, selam kena û înan rê sipas kena. Nê kesî heta şewe payan de yê. Înan erjê hişmendîya xoverdayîşî zêdînayî. Her kes erk û mesuldarîya xo hol zaneno. Ma senî pîya wayîrê Kobanê û Şingalî vejîyayî ganî ma pîya bi heman ruhî wayîrê Şorişê Rojawanî vejîyê. Wayîrvejîyayîşê Rojawanî wayîrvejîyayîşê merdimatî yo.''