Fermandaranê YPJyî vera xîretê dekewtişê Şingalî yê PDKyî nêrazîbîyayîşê xo mojna.

Mîyanê şerwan û fermandaranê YPJyî de ke tebaxa 2014î de korîdorêkê merdimîye semedê Şingalî akerd û êzidîyî xelisnayî Gilîdaxe Kobanê û Amara Serêkanîyê zî estbîyî. Wird fermandaran xîretê PDKyî yê vera Şingalî ANFyî rê ercna.

Fermandare Gilîdaxe vist vîrî ke PDKyî tebaxa 2014î de şarê Şingalî mîyanê qirkerdişî de verda û vat: ''DAÎŞî Şingal de qirkerdişêko pîl kerd. Hêrişê ewroyînî yê vera Şingalî manenê hêrişanê DAÎŞî. Ma sey şerwananê YPG-YPJyî senî ke o çax resayî hewarê şingalijan ewro zî do biresê înan. Prosesê xelisnayîşê Reqa de şerwananê YBŞ-YJŞyî mil bi mil ma reyde vera DAÎŞî şer kerd. Ma zî do şerê pawitişê êzidîyan û Şingalî de ca bigêrê. PDK Tirkîya reyde têgêreno. Peymana 9ê teşrîna verêne vera Şingalî bi waştişê Tirkîya ameye kerdene. Şingal semedê Rojawanî zaf krîtîk o. Pawitişê Şingalî yeno mana pawitişê êzidîyan ê mazlûman û pawitişê Rojawanî. Ma do hêrişêkê winasênî bêveng nêmanê.''

 Fermandare Amara Serêkanîyê îfade kerd ke PDK hêzanê komplogeran reyde vera hêzê pawitişî yê êzidîyanê Şingalî û HPGyî şer keno. Amara vat: ''PDKyî tebaxa 2014î de şarê Şingalî rê vat ê do înan bipawê la dima şar war verda. 2014 de wexto ke ma korîdorêk akerd û kewtî Şingalî rewşe zaf xirab bîye. Erd de cenazayê parçekerdeyî estbîyî. Ewro zî vera Şingalî heman hêrişî estê. PDK wazeno îradeyê şarî bişikno. Ma do bibê vengê êzidîyan û bêwaştiş şarê Şingalî bipawê. Pêşmergeyî ganî nêbê hemkarê planê PDKyî yê vera Şingalî. Ganî ma vera plananê winasênan bibê wayîrê tewirêkê zelalî.''