Hemsereka TEV-DEMî  Rûkene Ehmed derheqê hêrişê îşxalî û şuxulnayîşê çekanê kîmyewîyan ê dewleta tirke û hemkarîya PDKyî de ANFyî rê qisey kerd.

Rûkene Ehmed verî merdimanê 17 gerîlayanê ke pê çekanê kîmyewîyan şehîd bîyî û şarê kurdî rê sereweşîye waşte û vat: ''Vera şarê kurdî çeka kîmyewî newe nînê şuxulnayene. 1988 de Helebçe ra nata wina yo. Bitaybetî dewleta tirke ya faşîste vera  gerîlayan û şarê ma çekanê kîmyewîyan şuxulnena.  Nê di serranê peyênan de verê çimanê heme dinya de eşkera vera gerîlayan û kurdan çekê kîmyewîyî yenê şuxulnayene. Bêvengîya mîyannetweyî hemkarîya sûcî ya. Ma na bêvengîye şermezar kenê û sey hemkarîya dewleta tirke hesibnenê. Nê çekê kîmyewîyî têna merdiman nê xoza zî qetil kenê.  Bêvengîya dewletan û rayapêroyî ya mîyanneteweyî hermkarîya nê qirkerdişî ya. 2019 de  dewleta tirke Rojawan de zî çekê kîmyewîyî şuxulnayî. Domanê ke ameyî vêşnayene dîmenê înan heme dinya ra ameyî vilakerdene.''

Ehmede vist vîrî ke PDKyî dest nayo maskeyanê gerîlayanê HPG û YJA Starî ser û dayî çeteyan û vat:  Semedê pawitişê gerîlayanê Kurdîstanî maskeyê gazî ameyî şawitene.  Hêzê PDKyî yê ke paştî danê dewleta tirke dest na nê maskeyan ser. Eke dest nênîyayêne ê maskeyan ser belka gerîlayî şehîd nêbîyênî. PDKyî dest na maskeyan ser û semedê pawitişê çeteyan teslîmê dewleta tirke kerî.  Herinda fedayîyanê Kurdîstanî teslîmê dişmenê xo kerdî. Ganî keyeyê ke domanê înan şehîd bîyî şirê verê berê PDKyî û înan ra hesab bipersê.

PDK hinda xeta xîyanetî ra zî ravêrto. Hetêkî ra îşalkeran rê rayîr virazeno hetê bînî ra dest nano maskeyan ser. Hem zî verê teyaranê şerî û droneyanê çekdaran Başûrê Kurdîstanî de akeno ke rehet bombarduman bikerê. PDK paştî dano dewleta tirke ke wa vera gerîlan bin mekewê. Paştdayîşê PDKyî ra mebo dewleta tirke nêeşkena Başûr de yew game bierzo. Ganî şarê Başûrê Kurdîstanî PDKyî rê vajo bes o, vinderê.  Ewro xeyrê  gerîlayan kuçeyanê Rojhelatî de slogana Jin, jiyan, azadîye yena vatene. Şarê Rojawanî wayîrê gerîlayan vejîyeno la no qîm nêkeno. Ganî kurdî her cade vera îşxlakeran û hemkaranê înan têkoşînî xurtêr bikerê.''