Şaranê Rojawanê Kurdîstanî perey pîya Newroze fîraz kerde û vizêr zî roşanêko qedîm Akitu fîraz kerd. Roşanê Akituyî yo 6 hezar û 773 o ke sembolê wayûbiratî û haştîye yo, Rojawan de bi coşêkê pîlî ame fîrazkerdene. Roşanê Akîtuyî roşanê asûrî û sûryanîyan o û sey sembolê dîyayîşê wisarî yeno qebulkerdene.

Roşanê Akituyî 21ê adare de dest pê keno û heta 1ê nîsane dewam keno.  Verî 1ê nîsane de Roşanê Akituyî bi aktîvîteyanê pîlan ameyêne fîrazkerdene la qirkerdişan û tedayanê vera şarê asûr û sûryanî ra dima vîrakerdişê nê roşanî ame ferzkerdene. La rixmê nê çîyan zî şarê asûr û sûryanî wayîrê roşanê xo vejîyenê. Şaristanê Mêrdînî yê Vakurê Kurdîstanî de zî seba fîrazkerdişê Roşanê Akituyî destûtê dewleta tirke şert o.

Roşanê Akituyî Rojawan de bi aktîvîteyanê cîya-cîyayan û bi serbestî ame fîrazkerdene. Şayîyê tewr heybetînî zî binê hêrişanê dewleta tirke de Til Temir de ameyî kerdene.

Berpirsîyaranê Yewîya Cinîyan ê Xirîstîyanan ê Sûrîye ra Îlhame Metle şayîyanê Til Temirî de ajansê ma rê qisey kerd. Îlhame Metle da zanayene ke Roşanê Akituyî bi beşdarîya kurd, ereb, êzidî û tirkmenan bi coşî yeno fîrazkerdene.

Îlhame vat: ''Verê cû şayîyê qijî ameyêne kerdene. La Şorişê Rojawanî ra dima ma sey roşanî Akitu fîraz kenê. Rejîmê Şamî nêverdayêne ke ma nê roşanê xo fîraz bikerê. Roşanê Akituyî sembolê haştîye yo. Ma hêvî kenê ke Roşanê Akituyî aramî, asayîş û rojanê rindan bîyaro Rojawanî û pêro Sûrîye.''