Heyetê Partîya Seyyewbînîye û Demokrasîyî ya Şaran (DEM Partî) Wezîrê Edaletî Yilmaz Tunçî de pêvînayîş kerd. Heyetê DEM Partî de Serekwekîlê Meclîsî Gulistane Kiliç Koçyîgît û Sezaî Temellî û Hetkarê Hemserekanê Pêroyîyan Ozturk Turkdogan ca girewt.

Badê pêvînayîşê ke nizdê di saetan kerd derg, eşkerayîye ameye dayene.

Serekwekîla Meclîsê DEM Partî Gulistane Kiliç Koçyîgît eşkerayîye de nê vatî: "Sernameyê  pêvînayîşê ma şertê weşî û xebityayîşî yê Birêz Abdullah Ocalanî bî ke bi vengdayîşê 27ê sibate Tirkîya de berê yewna dewrî akerd û semedê çarserkerdişê meseleya kurdan gamêka bîne daye eştene. Ma vat Birêz Ocalan şertanê tecrîdî de nêeşkeno bixebito, semedê averşîyayîşê prosesî gerek şertê Birêz Ocalanî bêrê bedilnayene. Na babete de rojanê verê ma de ma do tay averşîyayîşan bivînê.''

Gulîstane Kiliç Koçyîgît ard ziwan ke Tirkîya de sîstemê edaletî de zaf problemê giranî est ê û înan no bi hewayêkê hîrayî girewt dest û wina dewam kerd: ''Babetanê ma yê tewr muhîman ra yew zî tepişteyê nêweşî bî. Na rewşe ne huqûqî ne zî merdimî ya. Ma vat tepişteyê nêweşî gerek cade bêrê serbest veradayene. Reyna ma babetê sey qanûnê înfazî, cezayê dîsîplînî, Heyetê Îdare û Çimdarîye yê ke tehlîyekerdişê tepitşeyan asteng kenê, girewtî dest û ma vat gerek pêro newe ra bêrê serûberkerdene,  gerek heme bêhuqûqîye bêrê wedaritene û binpaykerdişê heqan biqedîyê.''

Gulîstane Kiliç Koçyîgît badê eşkerayîye cewab da persanê rojnamegeran. Persê ''waştişê şima yê derheqê  babeta tecrîdî û serûberdkerdişê qanûnê înfazî wezîrî senî cewab kerd?''  ser o Koçyîqîte wina vat: ''Birêz wezîrî vatişê ma not kerdî. Xora derheqê tay serûberkerdişanê fermîyan de fîkrê ma hempar ê. Xora ma pêro zanê ke zaf neeheqîye girdî est ê. Mesela wextê pandemî de têna tepişteyê edlîyî kewtê qanûnê pandemî vera. Vatişê ma pêro not kerdî û vat ê do na babete bixebitê. Ma derheqê Dewaya Kobanê û meseleyanê bînan de zî erjnayîşî kerdî.''