Cîhane Guloya ke taxa Hilêlîye ya Qamişloyî ra ya, qala şinasnayîşê PKKyî û tesîranê ci kerde.

Cîhana ke 1984 de PKK şinasnayo vat: ''Rojêke embazêka bi nameyê Leyla amebî keyeyê ma û apê mi de nîqaş kerd. Reya verêne ma dîyêne ke cinîyêke camêrdan de nîqaş kena.Dima embaze Leyla cinîyî yew keyeyî de ardî pêser û înan de nîqaş kerd. Ma verî çîyo winasên nêdîbî, coka şaş mendî.  Ma nêzanayêne ke ma kam ê, cinî yê, kurd ê. Dadî û domananê ma nê nêzdîbîyayîşê PKKyî ra hes kerd. Şexsê PKKyî de ma şorişî ra hes kerd. Ma hînî waşt ke tewrê Têgêrayîşê Azadîye bibê. Mîyanê keyeyê mi de zî waştişo winasên vejîya vernî. Bi na fedakarîya ke PKKyî vetbî werte, xebatê ma hema zî dewam kenê. Ma qetî tira poşman nêbîyî û nêbê.''

Guloye îfade kerd ke înan reya verêne o çax manaya Newroze fam kerde û vat: ''Qamişlo de bi hezaran merdimî payan ser de bîyî, ver bi warê Newroze şîyî. Newroze bîye çalakîye. Newrozêka winasêne bîye ke wextê kilmî de amebî amadekerdene û coşîya ci pîle bîye. O çax keyeyê ma ra xeylêk kesî mîyanê Koma Xelate de ca bîyî. Koma Xelate Newroze de bîye Koma Çiya. O çax îmkanî zaf çin bîyî, provayî keyeyê ma de ameyêne kerdene. Mi zî destek dayêne înan.''