Merkezê Îrtîbatî yê Hêzanê Sûrîyeya Demokratîke (QSD) derheqê hêrişanê peyênan ê îşxalkeran û çalakîyanê hêzanê xo de eşkerayîye daye û nê vatî:

"Artêşa tirke ya îşxalkere vizêr (pancşeme) dormeyê Awbendê Tişrînî û dewa El Ramda  pê têyarayanê şerî dayî bombayan ver. Reyna dewê başûrê Minbicî pê çekanê giranan dîyayî bombayan ver. Artêşa îşxalkere bi 11 droneyan hêrişo hîra kerd. Hêzanê ma cewab da hêrişan û nê droneyan ra çar hebî ameyî wardayene. Hêrişo ke hewa û erdî ra ame kerdene de çeteyan hêrişê nuqtayanê ma kerd û hêzanê ma cewab da. Pêkewtişan de çeteyî ameyî kiştene û birîndar bîyî la hûmara înan zelal nêbîye. Yewîyanê Şehîd Harunî cewab da hêrişan, wesayîtêko roketbarkerde yê çeteyan  îmha kerd.

Cepheyê Dêr Hafirî de; artêşa tirke ya îşxalkere nuqtayêka hêzanê ma da bombayan ver, xesaro madî ame meydan. Vizêr heta şan serê herême de droneyî gêrayî.

Cepheyê Qereqozaxî de; teyarayanê artêşa tirke ya îşxalkere xeylê reyî hêrişê dewa Xeseqê kerd. Keyeyanê dewijan de xesaro madî ame meydan. Reyna dewê El Tina, Cada, Bir Heso, Xeseq, Dikan, Malhe û El Sena zî pê topanê giranan, tanqan, roket û havanan dîyayî bombayan ver. Keyeyanê sîvîlan xesaro madî ame meydan.

Çeteyanê artêşa tirke ya îşxalkere bombarduman û eştişê topan ra feyde kerd û hêrşê hêzanê ma kerd. hêzanê ma cewab da û hêriş şikit. Netîceya pêkewtişan de xeylê çeteyî merdî û birîndar bîyî la hûmara înan zelal nêbîye.

Cepheyê Eyn Îsayî de; artêşa tirke ya îşxalkere û çeteyanê ci dewê bajarî pê çekanê giranan dayî bombayan ver. Vera fabrîkaya çîmentoyî ya El Çelebiye bi droneyê xokiştişî hêriş ame kerdene, xesaro madî ame meydan. Azmîne herême de şewe roje teyarayê şerî û droneyî gêrenê.

Vizêr serê Kobanê û dormeyê ci de teyarayê şerî û droneyî gêrayî.''