Merkezê Çimdarîya Leşkerîye ya QSDyî netîceyê operasyonanê leşkerîyan ê vera hucreyanê DAÎŞî yê Rojawanî eşkera kerdî. QSDyî pare kerd ke Tirkîya cuya bi mîlyonan merdiman visnena binê tehlukeyî.
Merkezê Çimdarîya Leşkerîye ya QSDyî raporê xo yê menga hezîrane eşkera kerd. Rapor de ame vatene ke dewleta tirke û cerganê ci qanûnî binpay kerdî û menga hezîrane de awa Îstasyonê Elokî birnaye, mîktarê awa Firatî kêmîna û bi nê hawayî cuya bi mîlyonan merdimî vistî binê tehlukeyî.
Rapor wina dewam keno: ''Dewleta tirke 565 reyî peymana adirbirnayîşî ya 17ê teşrîna verêne ya 2019î binpay kerdî. 393 reyî herêmê Efrînî û Helebî dayî bombayan ver. Nê bombardumanan de 65 kesî kişîyayî û birîndar bîyî. Efrînî ra 63 sivîlî ameyî remnayene. Herême de teqayîş, serebûtê hedefkerdişî, alozîye û kişîyayîşê sivîlan bi destê cerganê Tirkîya Cebhet El Nûsra û ê bînan dewam kenê. Menga hezîrane de 13 serebûtê hêrişê cînsî û teqayîşî qewimîyayî.
Cerganê DAÎŞî û hucreyanê terorîstan hezîrane de 11 reyî hêrişê herême kerd. Netîceya nînan de 23 sivîlî, hêzê asayîşî û leşkerî merdî û birîndar bîyî. Hucreyanê DAÎŞî Kampa Holê de têgêrayîşê xo rê dewam kerd. Kampa Holê de wexto ke remayêne 42 cinîyî û 43 domanî ameyî tepiştene.
Operasyonanê QSDyî yê vera DAÎŞî de 57 endamê hucreyanê terorî ameyî tepiştene ke nînan plan kerdêne ke vera şar û hêzanê asayîşî çalakîyanê terorî bikerê. ''
Rapor de ame vatene ke QSDyî 55 domanî hêzanê asayîşî ra vetî û keyeyanê înan rê teslîm kerdî.
