26 partîyanê kurdan ê Rojawanî bi semedê yewîya neteweyîye gamêka neweyî eşte û  eşkerayîyêka hempare veng da ke wa heme kurdî bêşert bêrê têhet.

Vengdayîş de hêrişê dewleta tirke ya îşxalkere yê vera kurdan ame vîrardene û ame vatene ke dima ke hukmatê AKPyî xeylêk cayê Rojawanî îşxal kerdî nika zî vera Başûrî hêrişê xo zêdînayî. Kurdî ganî heme problemanê mabênê xo ca verdî û semedê pawitişê erdê  xo bibê yew û pîya tê bigêrê. Semedê nayî ganî heme partîyê sîyasîyî yê kurdan bêşert bêrê têhet û berpirsîyarîya xo bîyarê ca.

Hetê bînî ra bajaranê Qamişlo û Hesekê yê Rojawanê Kurdîstanî de zî  şar vejîya kuçeyan û waştişê yewîya neteweyîye ard ziwan.

Qamişlo

Qamişlo de temsîlkarê bi desan partîyanê sîyasîyan û rêxistinan zî tede bi des hezaran kesî Hesekê û Qamişlo de semedê yewîya neteweyîye ya kurdan bêro caardene  rayra şîyî. Temsîlkarê ENKS yo ke verê cu seba ke semedê yewîya neteweyîye gamêk nêerzeno ameyêne rexnekerdene zî tewrê ci bîyî. Rayraşîyayîş de bi sloganan bale ameye antene serê qirîngîya yewîya neteweyîye. Badê rayraşîyayîşî de mîtîngêk ame viraştene û metno hemaro ke hetê 26 partîyanê sîyasîyan ra ameyo amadekerdene ame wendene û ame vatene ke ganî heme  partîyê sîyasîyî  yê kurdan bêşert bêrê têhet.

Hesekê

Hesekê de zî bi heman waştişî şar kuçeyan de bi. Mîtîng de ame vatene ke ganî heme partîyê sîyasîyî yê kurdan pêro meseleyanê xo ca verdî û pêro pîya semedê çarekerdişê meseleyanê bixewitê. Mîtîng bi slogananê yewîya neteweyîye qedîya.