Têgêrayîşê Komelê Demokratîkî (TEV-DEM) derheqê hêrişanê dewleta tirke yê vera Rojawanî de eşkerayîye daye.

TEV-DEMî vist vîrî ke Îdareyê Xoserî semedê çareserkerdişê krîzê Sûrîye deklarasyon weşana û qerar girewt ke do çeteyanê DAÎŞî muhakeme bikero û vat, “Koalîsyonê Mîyanneteweyî yo ke serkêşîya ci Rûsya û Amerîka kenê, mudaxaleyê hêrişan nêkenê û tewirêkê ehleqî ranêmojnenê. Wird hetî zî goreyê menfeatê xo têgêrenê. Inkey Şehba de bêîstîkrarîye est a. Dewleta tirke û çeteyanê ci herême de şer îlan kerdo. Rûsya û Şam zî vera nê hêrişan tewirê zelalî ranêmojnenê.

TEV-DEMî hêrişê vera nêweşxaneyê Til Rifetî sey cehdkerdişê qirkerdişêkê neweyî name kerd û vat, “Tîya waştişo bingeyên oyo ke cuya bi hezaran nêwaşan bierzîyo tehluke û şar koçbarî rê mecbûr bimano. Têna nê nêweşxaneyî rixmê hêrişan û ambargoyî xizmetê nêweşan kerdêne û mudaxaleyê rewşanê lezabezan kerdêne. Netîceya hêrişî de xebatê nêweşxaneyî ameyî vindarnayene. Dewleta tirke seba ke îstîkrarê herême çîn bikero û muhakemekerdişê terorîstanê DAÎŞî asteng bikero hêrişî zêdînayî.”

TEV-DEMî bale ante bêvengîya Neteweyanê Yewbîyayeyan (NY), rêxistinê heqanê merdiman û Komîteya Xaçê Sûrî ya Mîyanneteweyî (ICRC) ser û vat, “Bêvengîya vera hêrişan do verê felaketêke abikero. Ma veng danê şarê kurdî û heme şarê herême ke wa paştî bidê şarê ke Şehba de vera hêrişanê qirkerdişî yê dewleta tirke xover dano. Gerek têkoşîn û xoverdayîş bêro xurtkerdene.”