Hetkarê Hemserekanê Îdareyê Xoserî yê Vakur û Rojhelatê Sûrîye Bedran Çiyakurdî krîzê Sûrîye bi taybetî krîzê Rojawanê Sûrîye, pêvînayîşê Rûsya û Şamî, pêvînayîşê Muhaberat-MÎTî, gef û îşxalê dewleta tirke yê herême, şerê Idlîbî û yewîya neteweyî ercnayî.

Çiyakurdî vat: "Armanco verên ê dewleta tirke Rojawan de xerakerdişê yewîya erdê Sûrîye yo. Dewleta tirke beşêkê erdê Sûrîye îşxal kerd. Zaf hêz û dormeyî ci ra ecîz ê. Şam zî aye ra û Rûsya ra ecîz o. Seba na cîzîye zî tay eşkerayîyî dayî. Ma seba çinkerdişê îşxalê dewleta tirke paştî danê yewbînan.Heta ke beşêkê Sûrîye wina bêro îşxalkerdene ma nêeşkenê qala çareserîyêka sîyasîye bikerê. Tewirê ma yê vera Peymana Anqara eşkera yo. Ma na peyman peymanêka vera şaran, bi taybetî peymanêka vera şarê kurdî vînenê. Eke çareserîye yena waştene ganî peymanê winasên ê ke îradeyê şarî binpay kenê newe ra bêrê ercnayene.

Rûsya seba ke mabênê Îdareyê Xoserî û Şamî de dîyalogî dest pêbikê zaf xiretî kerd. Labelê seba çareserîyêka sîyasîye Şam reyde pêvînayîşêkê binîzamî hema dest pênêkerd. Labelê seba xîret yeno kerdene.Rûsya xîret kena ke Îdareyo Xoser û Şam pêbikerê. Rûsya wazena ma her di terefan bikera blokêk û bivisna binê însîyatîfê xo. Bêgûman na babete de vînayîşê ma estê. Ma vanê ganî Îdareyo Xoser, îdareyê herêmî, dezgehê ma, pawitiş û îradeyê ma bêrê naskerdene. Çarserîya sîyasî têna bi nê hawayî yena caardene.

Netîceyê pêkerdişê DYA û dewleta tirke de Serêkanîyê û Girê Sipî, netîceyê pêkerdişê Rûsya û dewleta tirke de zî Efrîn ame îşxalkerdene. Coka ma her tim bi gumanî nêzdîyê kerdişanê nê welatan benê.Projeyê îşxalê dewleta tirke projeyê parçekerdişê Sûrîye yo. Komê terorî yê ke dewleta tirke herême de ca da înan her kes rê gef wanenê. Sere de zî estbîyayîş û yewîya dewleta Sûrîye rê gef wanenê. Gefê înan nêqedîyeno. Ma neçare yê ke hesabê xo tim goreyê nê gefan bikerê.

Pêkerdişê QSDyî û artêşa Sûrîye seba vergirewtişê îşxalê dewleta tirke ame kerdene. QSD û artêşa Sûrîye eşkenê Serêkanîyê ra heta Idlîbî pîya vera îşxalan û terorî têkoşîn bikerê. La seke ma reya verêne vat no bi pêkerdişêkê sîyasî beno. Têkoşînê leşkerî yo hempar bi peymane û îtîfaqî beno. Nêbo qels beno. Seke ma tim vanê îtîfaqê mabênê Îdareyê Xoserî û îdareyê Şamî îtîfaqê mabênê QSDyî û artêşa Sûrîye do Sûrîye xurtêr bikerê. Hetê sîyasî, leşkerî û ekonomîkî ra Sûrîye do xurtêr bikerê.

Tirkîya seba Kurdîstanî gefêka tewr pîlêr a. Ganî ma vera nê gefanê Tirkîya tewirêko hempar bimojnê. Eke alozaîya mabênê DYA û Îranî pîlêr biba ê do hesabê xo warê Iraq û Sûrîye de bipersê. Coka ganî vera nê senaryoyanê biîhtîmalan Rojawan û Başûrê Kurdîstanî û parçeyê bînî seba pawitişê menfaatan ê hemparan têkilîyêka xurte bikerê."