Ajansê xeberan ê fermîyî SANA pare kerd ke vera meydana teyaraya ê T4î hêrişêk ame kerdene. Çimeyêkê leşkerî eşkera kerd ke sîstemê pawitişê hewayî cewab da hêrişî  û tay fuzeyî eştî.

Goreyê heman çimeyî çar fuzeyî kewtî hedef û têna zeraro madî baregeh de ame meydan.

Hêriş roja sêşemeyî goreyê wextê herême saete 22:00 de herêma Hûmsê de ame kerdene. Îsraîlî heta nika şîroveyêk nêkerd.

Wexto ke no hêriş ame kerdene alozîya mabênê DYA û Îranî zêde bîye. DYA 3ê çeleyî de Bexdad de fermandarê Îranî Qasim Silemî kiştbi, Îran zî 8ê çeleyî de bi fuzeyan hêrişê di baregehanê Amerîka kerdbi.

Serra 2011î ra heta destpêkerdişê şerê zereyî yê Sûrîye û nika Îsraîlî zaf reyî hêrişê hewayî kerdî. Hêrişî bi giranî vera Îranî û mutefîqê înan Hîzbullahî ameyî kerdene.

Mudirê Dezgehê Çimdarîye yê Heqanê Merdiman Ramu Abdulrahmanî AFP reyde qisey kerd û ard ziwan ke meydanê teyarayan ê leşkerî yê T4î de hêzê rejîmî, hêzê Îranî û şêwirmendê leşkerî yê Rûsya estê.

Heman baregeh nika ra verî zaf reyî bî hedefê hêrişanê hewayî yê Îsraîlî. 9ê nîsana 2018î de bi fuzeyan baregehê leşkerî yê T4 amebi pirodayene û netîce de 7ê ci îranijî, 14 şerwanê terefgîrê rejîmî merdbî. Îran, Rûsya û Sûrîye hêrişî ra Îsraîl sey berpirsîyar dîbi.