Leymane Şiwêş (Rihane Amûdê) 3yê teşrîna peyêne ya 1968î de Amûdê de dadîya xo ra bîya. A mîyanê 9 way û birayan de aya qijêre bîye. Leymane 6 serran şîye dibistane. 

Birayê Rihane Abdullah Rojawan de têkoşînê azadîye şinasna û 1994 de Garzan de sey gerîlayêkî şehîd bi. Rihane zî 17 serrîya xo de  kadroyanê verênan ê têkoşînê azadîye yê Kurdîstanî ra Bêrîvane (Binevşe Agal) şinasnaye û bi tesîrê aye tewra xebatan bîye Dima aye verê xo da koyan. Rihane 1994 de Warê Rayberîye de mende, 2002-2003 de Başûr de hetê hêzanê PDKyî ra tepişîyaye û 6 mengan zîndan de mende. 

Rihane Başûrî ra heta Rûsya xeylêk cayan de bi aktîfî erkî ardî ca, vera cerganê DAÎŞî Kobanê ra heta Minbicî şer kerd. A Rojawan de seba rêxistinîya cinîyan û awankerdişê sîstemê cinîyan bi aktîfî têgêraye. Rihane seba yewîya neteweyîye zî zaf xîre kerd. Rihane Amûdê 20ê hezîrana 2023yî de wextê pêvînayîşê Mesrûr Barzanîyî û Erdoganî de bi droneyê çekdarî ameye qetilkerdene.

Rojnamegere Stêrke Guloya ke 23 serran Rihane de embazîye kerda, ANFyî rê qala ci kerde.

Stêrke Gulo da zanayene ke Rihane Amûdê keyeyê welatperwerî yê bi nameyê Şiwêşî ra bîya û keyeyê ci şehîdî dayê Şorişê Rojawanî. Stêrke Gulo vat: ''A kênaya qijêre ya keyeyê xo bîye. Wexto ma yewbînî şinasnayî, ma wirdî zî qij bîyî. Embaze Rihane 1985 de embaze Bêrîtane şinasnaya û 3 saetan tede qisey kerda. Dima zî tewra têkoşînî bîye. Aye sey cinîya kurde vera rejîmê Baasî û urf û edatanê komelî têkoşîn kerd. A eşiqa Kurdîstanî bîye. 

Mi a serra 2000î de şinasnaye. O çax zî seba dewaya azadîya cinîyan û kurdan xo ver dayêne. Aye çar parçeyanê Kurdîstanî de zî têkoşîn kerd. A Başûr de 6 mengan hetê PDKyî ra tepişîyaye. O çax hînî a pê bawer bîye ke ganî xeta neteweperestîye Kurdîstan de biqeda coka aye seba ney zaf têkoşîn kerd. A hem cephe de şer kerdêne hem zî xo îdeolojîya Neteweya Demokratîke ser o aver berdêne. Têkoşînê xo yê vera DAÎŞî de zî aye kesayetê cinîya azade bi layîqî temsîl kerd û pêro cinîyê herême rêxistin kerdî. A heta şehadetê xo bêmabên têkoşîn kerd. Kênaya qije ya keyeyê Şiwêşî Rihane cuyêka azade ra heta têkoşînêkê xurtî peyê xo de mîrasêkê têkoşînî yê 38 serran verda.''

Stêrke Gulo bale ante ser ke dewleta tirke ya îşxalkere bi hêrişanê serê cinîyan ê serkêşan 'qirkerdişê cinîyan' kena û vat: ''Ma pêvînayîşê Astana ra dima eşnawit ke ê DAÎŞî sey rêxistina terorî nêvînenê la embazanê ma yê sey Rihane û Yûsra rê vanê terorîst. Ma do şexsê embazanê xo yê şehîdan de tim xoverdayîş aver berê û apey gamêke nêerzê. Dewleta tirke do bi hêrişanê xo nêresa armancê xo.''