Kamûran Hesen Mehdî Qamişloyî ra yo. Mehdî wextê Xoverdayîşê Bagokî yê 1ê Nîsana 1988î de Têgêrayîşê Azadîye şinasneno û 1990 de tewrê xebatanê têkoşînê azadîye beno. 

Mehdîyî qala ê rojan kerde û ard ziwan ke Xoverdayîşê Bagokî yê 1ê Nîsana 1988î sey Hemleya 15ê Tebaxe tesîrê Rojawanê Kurdîstanî kerd. Mehdîyî vat: ''Mêrdîn nêzdîyê Qamişlo, Amûdê, Tirbespiyê û Dirbêsiyê yo. Bagok verê Qamişloyî de yo. O çax 16 serre bîya. Wexto ke mi Xoverdayîşê Bagokî eşnawit zaf tesîrê mi kerd. Milîtananê Rayber Apoyî o çax Rojawan de mîyanê şarî de xebatî ardêne ca. Înan zîyaretê keyeyan de qala nê xoverdayîşî kerdêne. Hemleya 15ê Tebaxe zî tesîrê Rojawanî kerdbi. Na Hemle coşêko pîl da şarî, mîyanê şarî de bawerîyêka pîle viraşte. O çax embazî mîyanê ma de bîyî. Ma nêzanayêne ke nameyê înan gerîla yê.''

Mehdîyî vist vîrî ke o çax Rojawan de şar bi giranî binê tesîrê partîyanê pabesteyê PDKyî de bi û vat: ''Keyeyê mi zî paştî dayêne PDKyî. Dima ke PDKyî 1979 de çeke verdabî mîyanê şarî de nêrazîbîyayîşêko pîl virazîya. Xoverdayîşê Bagokî ra dima şarî dormeyê Apogîran de ca girewt. Xoverdayîşê zîndanan ra dima zî ciwanê Rojawanî ref bi refî tewrê gerîlayan bîyî. Partîyanê pabesteyê PDKyî Xoverdayîşê Bagokî ra dima vilawekî vila kerdî û xîret kerd ke nê xoverdayîşî reş bikerê. PDKyî û baskanê ci yê Rojawanî vera têgêrayîşê azadîye tim propaganda kerd.

Nika zî nêzdîbîyayîşê PDKyî heman o. Şorişê Rojawanî qewimîya, Îdareyo Xoser ronîya la PDK dewleta tirke de bi yew. Partîyê pabesteyê PDKyî tewrê îşxalê Efrîn, Girê Sipî û Serêkanîyê bîyî. PDK dormeyê gêrîlayan gêno û gerîlayan qetil keno. PDK nika bi hawayêkê eşkerayî dişmenîya kurdan keno. Ma xeberan ra eşnawenê ke PDK amadekarîye keno ke tewrê şeerê dewleta tirke bibo.''