Bagok serranê 1980an de bi baregehanê gerîlayan ra yew. Adara 1988î de nêzdîyê 30 gerîlayê neweyî tewrê Artêşa Xelisnayîşê Şarê Kurdîstanî (ARGK) bîyî û dest pê perwerdeyê leşkerî û sîyasîyî kerd. Perwerde hetê fermandaranê ARGKyî Yaşar (Delîl) û Mûstafa Kaplan (Kazim) ra dayêne. Fermandar Delîlî verî Botan û Garzan de, fermandar Kazimî zî Mîdyat û Nisêbîn de karê perwerde û rêxistinîye kerdbî. 

1ê nîsana 1988î de seba nê gerîlayanê neweyan merasîmê mezunîyetî ame kerdene. Arşîvê rojnameyê Serxwebûnî de di fotografê nê merasîmî estê. Fotografê yewînî de dîyeno ke gerîlayî binê versîya dare de perwerdeyê sîyasîyî vînenê.

Fotografê diyînî de zî dîyeno ke destê înan serê alayanê ARGK/ERNKî de gerîlayî sond wanenê. Nê fotografî de fermandar Delîl payan ser de yo, fermandar Kazim ronişte yo û ê merasîmî amade kenê.

Wexto ke no fotograf amebi antene artêşa tirke pê 10 hezar leşkeran dormeyê Koyê Bagokî girewtêne. Leşkeran serê sibayî îxbarêkî ser o wextê merasîmî de dest pê hêrişî kerd.

Bagok bi nameyê xoverdayîşê gerîlayan

Gerîlayê Bagokî wayîrê tay tecrubeyan bîyî la tayê înan hema çeke zî nêgirewtbi destê xo. La şerkerdişî ra ber çareyêka înan çin bîye.

Mîyanê nê gerîlayan de Aytene Tekîn (Rojbîne) est bîye. A Îzmîrî ra kewtbî rayîr û 8ê adara 1988î de tewra gerîlayan bîye. Rixmo ke perwerdeyê ci nêqedîyabi xoverdayîşê aye gerîlayanê bînan rê bi moral. Herême de şer rojêke û şewêke dewam kerd.

Şerî ra dima medyaya tirkan pare kerd ke serdarêko pîlot û di subayî kişîyayê û hûmara raştikêne nimite. La no xoverdayîş hende pîl bibi ke dewleta tirke nêeşkaye netîce binimna û Botan û Merdîn de xoverdayîşî veng vet.

Goreyê bîlançoya ARGKyî nêzdîyê 200 leşkerê tirkî şerî de kişîyayî. Gerîlayan pê îmkananê xo yê kêman helîkopterêk vist war. Serra 1984î ra nata reya verêne şerêko hende pîl qewimîyayêne.

Nê şerî de 20 gerîlayî zî şehîd bîyî; Veli Yaşar (Delîl), Mustafa Kaplan (Kazim), Aytene Tekîn, Yaşar Talay (Hemîd), Faysal Çatıkkaş (Îsa) Mehmet Musbah Yavuz, Cevat Yavuz (Şiyar), Emin Çevik (Yasin), Mehmet Kurt (Loqman) Nurişan Ay (Beşîr), Nesim Oral, Mehmet Emin Kaya (Dewran), Cemal Karakaş (Rustem), Veli Kumak (Şoreş), Mehmet Vahaç Doğan (Delîl), Koçero Gulmez (Diyar), Xebato ke Başûrê Kurdîstanî ra bi, Nevaf Yildirim (Celal), Cûmayo Bismilij, Cemalo cizîrij.

Endamê Komîteya Rayberdişî ya PKKyî Murat Karayilanî kitabê xo yê bi nameyê 'Anatomîya Şerêkî-Kurdîstan de Xeta Leşkerîye' de wina qala şerê Bagokî kerde: ''O çax zafê hêzê ma Mêrdîn û Dêrsim de bîyî. Bi taybetî Mêrdîn de embaz Sabrî (Emîn Aslan) zaf xîret kerd. Serra 1988î de şerê Bagokî de embazanê ma Battal û Delîl Halfetî reyde 20 şorişgêrê ercîyayeyî şehîd bîyî. Embaze Aytene Tekîn newe tewra gerîlayan bibî. Aye xoverdayîşê Bagokî de bi çêrî şer kerd û şehîd bîye. Nê şehadetan ra per dima ke embaz Sabrî 11 embazanê xo reyde şehîd bi Eyaletê Mêrdînî derbêka girane werde. La rixmê ney zî Mêrdîn de karaktero azadîpawitox, averwaz û xoverdayox ê PKKyî aver şi. Heman wextî de o çax nêzdîbîyayîşê raştikênî yê şarî reyde destkewteyê pîlî ameyî destvistene.''

Xoverdayîşê Bagokî bi deyîra 'Li Bagokê' ya Hozan Dilgeşî hema zî vîrê merdiman de yo.