Serkêşîya TJA de kadroyanê serkêşan ê PKKyî ra Alî Haydar Kaytan û Riza Altun Amed de, Meydanê Şêx Seîdî de bi merasîmêkî ameyî yadkerdene. Xeylê kesî tewrê merasîmî bîyî. 

Yadkerdişî ra verê cû cinîyan rayraşîyayîşêk kerd. Şaro ke Mêrdinî ra ameyo zî tewrê rayraşîyayîşî bi. Rayraşîyayîş de sloganê sey “Heval Fuat- Heval Rıza rûmeta me ne”, “Bijî Serok Apo”, “Jin, jiyan, azadî”, ‘‘Şehîd Namirin’’ ameyî vatene û fotografê Altun û Kaytanî ameyî kiriştene.

Hemserekê DBPyî Keskîn Bayindir, Wekîlê DEM Partî zî tewrê yadkerdişî bîyî.

Merasîm bi Çerxa Şoreşê û deqayêkê rêzgirewtişî dest pêkerd.

Hemserekê MEBYA-DERî Mehmet Emîn Kiliçî merasîm de qisey kerd û vat ke ganî armancê haştîye yê şehîdan bêro caardene. Kiliçî vat: ‘’Birêz Ocalanî seba haştîye veng da. Nika ganî dewlete game bierza.’’

Îdarekaranê MEBYA-DERî yê Êlihî ra Ugur Agirî metnê yadkerdişî wend. Pîranê Dêrsimî çerayî vistî ta û dima mesajê Rayber Apoyî yê seba şehadetanê Altun û Kaytanî ame wendene. 

Hemvervatoxa Înîsîyatîfê Yewîya Demokratîke û Wekîla DEM Partî Gulcane Kaçmaz Sayyîgît zî Altun û Kaytan yad kerdî û vat: ‘’Têkoşînê ma seba azadîye, haştîye û yewîye yo. Ma mesuldar ê ke vengdayîşê Rayber Apoyî bîyarê ca û wayîrê ci vejîyê.’’

Bername de şîîra Kaytanî amete wendene û Hasan Ekîncî lorikî vatî.

Bername 18.00 de bînaya DBPyî de do dewam bikero.