Kongreya 12ine ya PKKyî mabênê 5-7ê gulane de Herêmanê Pawitişî yê Medya de amebî kerdene.

Endama Konseya Rayberdişî ya KJKyî Çîgdeme Dogu kongre de wina qisey kerd:

‘’Ma kongreya feshkerdişî hê kenê. La PKKyî şehîdan reyde erjê pîlî, exlaqî, kulturî û felsefeya cuye afernayê. Bêguman ma nê erjanê xo fesh nêkenê. Nê erjî bingeyê nê prosesî de do bêrê caardene. Dişmen keno ke wina bimojno ke PKK bin kewto. La ma zanenê ke feshkerdişê PKKyî binkewtiş û rijîyayîş nîyo. 

Na kongre her hetî ra kongreyêka tarîxî ya. Bi talîmatanê Rayber Apoyî ma na kongre kenê. Coka na kongre hendê manadar û qîmetên a. Ez bawer kena ke netîce do tesîrê pêro herême bikera. PKK bi na kongre do serkêşîya vurîyayîşî bikero.

Raştîya PKKyî seke romanêko bêpeynî yo. PKK seba ma pêroyînan bîyo dadîyêke. Erjê ke ma mîyanê keyeyî de nêmusayê mîyanê PKKyî de musayê. PKKyî her çi musna ma cinîyan. PKKyî exlaqê azadîye aferna, felsefeya azadîye afernaye.

Rayber Apoyî tim pespektîfê neweyî dayî verê ma. Belê ma PKKyî fesh kenê la erjanê PKKyî kok dayo. Ma nê kokî zixmêr bikerê. Sey delegeyanê na kongre mesuldarîyê ma yê pîlî est ê. Prosesê verê ma dîyar o. Tehlukeyî est ê, rîskî est ê. Coka ganî ma prosesî rind biercnê.’’