Dewa Axdatî ya qezaya Pulurî ya Dêrsimî de bi wesîleya serrgêra hêrişanê qirkerdişî yê ke 4ê
gulane de ameyî destpêkerdene programê vîrardişî ame organîzekerdene. Semedê Seyîd Riza û hemrayanê ci 40 leyî ameyî ronayene.

Komeleyê Elewîyan ê Demokratîkan (DAD), DEM Partî, Şaredarîya Dêrsimî,Komeleya Kulturî ya Pîr Sultan Abdalî (PSAKD) û merdime Seyîd Rizayî tewrê vîrardişî bîyî. Vîrardiş de 40 leyî ameyî ronayene.

Vîrardiş de kesê ke qirkerdiş me ameyî qetilkerdene ameyî vîrardene û çêraxî ameyî tafînayene.

Hemsereka Pêroyî ya DADî Kadriye Dogan Seyîd Riza û hemrayê ci bi hurmetî yad kerdî.

Hemserekê Pêroyî yê DADî Zeynel Kete zî vat: “Wayîrbîyayîşê yew mezarî, wayîrbîyayîşê yew mekanî, wayîrbîyayîşê yew kultur û tarîxî yo. Coka mezelê pîrê ma û cananê ma êyê ke sey ey rayîrê heqîqetî de ver bi heqî rayra şîyênî çîn kerdî.”

Serekê Şubeyê PSAKDyî yê Dêrsimî Ekber Kayayî zî vat  1937-1938 de nizdê 70 hezar kesan ameyî qetilkerdene. Dewlete wa ozrê xo biwazo. Wa cayê mezelan berê eşkerakerdene."

DEM Partî ra Yuksel Mutlu zî 4ê Gulane sey " Roja sîyaye " name kerd û vat: “Vera roja sîyaye doman û tornê Seyîd Rizayî têkoşînî rayra benê. Vera xirabîya birêxistene ganî ma zî têkoşîn û xoverdayîşê birêxistene rayra berê.”

Hemşaredara Dêrsimî Birsene Orhan zî vat: “Na herre de bi hezaran erjî bêkefen ameyî definkerdene. Ma do hesabê nê qirkerdişan bipersê.”

4ê gulane de roja şemeyî do merkeze bajarî de aktîvîteya vîrardişî bêro kerdene.