Hemşaredara Bajarê Pîlî yê Amedî Gultane Kişanak bado ke hewt serrî û panc aşmî zîndan de sey rehîne ameye tepiştene, Zîndanê Kocaeli ra ameye tehlîyekerdene. Kişanake Meydanê Teyarayan ê Dîyarberî de hetê Hemşaredaranê Bjarê Pîlî yê Amed û Mêrdînî, aktîvîstanê TJA, îdarekaranê DEM Partî û DBPyî û cinîyan ra bi slogananê “Jin jiyan  azadî” û vilikan ameye pêşwazîkerdene.

Gulatane Kişanak qiseykerdişê xo de wina vat: ''Ma kêm ameyî, heta ke heme embazê ma bibê azad ma zî azad nîyê. Kobanê meseleyêka wîjdanî ya. Dima ra  sey Dewaya Kûmpasî ya Kobanê vejîyaye verê ma. Hema zî wina dewam kena. Ma do heme embazanê xo bikerê azad û bêrê Amed de kovenda azadîye bîkerê. Ma ewro kêm ê, ma biney dejnayeyê. Embazê ma qelbê ma de yê, têkoşînê ma de yê, pîya bi ma yê. Ê zî wina wazenê.''

Gultane Kişanak ard ziwan aye selamê Fîgene Yuksekdag ardî û mesajê ci bare kerd. Kişanak vat: ''Ma do nê rojan xo dima verdê. Mi selam û hêvîya têkoşînî yê embazanê xo şima rê ardî.''

Gulatane Kişanak dima verê xo da Rêxistina DEM Partî ya Amedî û tîya zî bi coşî bi slogananê “Jin, jiyan, azadî" û  "Bijî berxwedana Kobanê"  ameyî pêşwazîkerdene.

Gultane Kişanak wina qisey kerd:  ''Hemrayê ma dewayêka kûmpasî de bîlasebeb ameyî mehkumkerdene. Kobanê eslê xo de dewayêka merdimîye û wîjdanî bî. O wext hewtî ra heta hewtayî her kes Kobanê de wayîrê merdimîye, wîjdan û anorî vejîya. Qerarê vizêrî semedê ma bêmana yo. Ma zanê ke embazê ma yê ke ûca de yê her yewê/a înan semedê haştîya şaranê ma, azadîye û demokrasîyî ciwîyayî.  Semedê nê nefes girewt, semedê nê têkoşîn kerd. Ewro zî zîndanan de eynî têkoşîn dewam keno."