Wekîlê DEM Partî yê Mêrdînî Kamuran Tanhanî derheqê tecrîdê vera Rayberê Şarê Kurdî Abdullah Ocalanî de ANFyî rê qisey kerd.

Tanhanî ard ziwan ke şexsê Abdullah Ocalanî de 25ê serrî yo huqûq yeno betalkerdene û vat: ''Ocalano ke muxatabê çareserîya meseleya kurdan o û aktorêko sîyasî yo girîng o, tecrîdê vera ey bi hawayêkê negatîfî tesîrê komelî keno. Wexto ke prosesê çareserîye de tecrîd amebi sistkerdene aramîyêke amebî Tirkîya. 

Abdullah Ocalan babeta çareserîya meseleya kurdan û qedînayîşê şerî de muzakerewano sereke yo. Tecrîdê vera Abdullah Ocalanî krîzê ekonomîkî giran keno. Bi tecrîdî heqê merdiman zî yenê astengkerdene.''

Tanhanî bale ante ser ke tepişteyî çarçewa safhaya diyîne ya grevê vêşanîye de mehkemeyan boykot kenê û nêşinê pêvînayîşan. Tanhanî vat: ''Grevê vêşanîye reyde xeylêk cayan de zî 'Nobeta Edaletî' yena kerdene. Sîstemê tecrîdî yê Îmraliyî vilayê pêro komelî bîyo. Tecrîd bi xirabî komelî keno û bi sîstemê tecrîdî komelî rê bedelêko giran yeno ferzkerdene. Zîndanan de tim heqê merdiman yenê binpaykerdene. Vera tecrîdî ganî ma tim têbigêrê û hetê tepişteyan de cabigêrê. Seba çareserîya meseleya kurdan, seba caardişê huqûqî ganî ma wayîrê çalakîya tepişteyan vejîyê.''