Dewaya Kobanê sey dafikêka îqtîdarî ya vera HDPyî bi bahaneya çalakîyanê 6-8ê teşrîna verêne ya 2014î vera hêrişanê DAÎŞî yê serê Kobanê amebî akerdene.

Hemserekê HDPyî yê verênî Fîgene Yuksekdag û Selahattîn Demîrtaş zî tede 18ê ci tepişteyî 108 kesî dewa de yenê muhakamekerdene.

Roniştişê biredayîşî yê dewa Kampusê Zîndanê Sîncanî de dest pêkerd. Çar noqtayê cigêrayîşî dekewtişê kampusî de ronîyayî. Destûr nêdîyeno ke kesê ke wazenê roniştişî teqîb bikerê, derbazê warê zîndanî bibê. Teyna avûkat û rojnamegeran rê destûr dîya. 

Bi seyan kesî neçare mendî ke roniştişî bi rayîrê SEGBÎSî teqîb bikerê. 

Ecêb o ke cendirme û polîsan verê salona roniştişî de fotografê komkî yê 'vîrameyîşî' antî.

Hemserekê DBPyî Çîgdem Kiliçgun Uçar û Keskîn Bayindir, Hemserekê DEM Partî Tulaye Hatîmogullari û Tuncer Bakirhan, Serekwekîlê Koma CHPyî Alî Mahîr Başarir û xeylêk temsîlkar û endamê partîyan û dezgehan roniştişî teqîb kenê. 200 avûkat û 10 baroyî zî tewrê roniştişî bîyî.

Derheqê 108 sîyasetmedaran de bi îdîaya 'xerakerdişê yewîya dewlete' û îdîayanê bînan 'cezaya muebede ya girankerde' yena waştene.

Nameyê sîyasetmedaranê tepişteyan wina yê:

“Fîgen Yuksekdag, Selahattîn Demîrtaş, Alî Urkut, Gunay Kûbîlay, Nazmî Gur, Îsmaîl Şengul, Bulent Parmaksiz, Alp Altinors, Sebahat Tûncel, Zeynep Karaman, Zeynep Olbecî, Aynûr Aşan, Ayşe Yagci, Ayla Akat Ata, Dîlek Yagli, Pervî Odûncû, Meryem Adibellî, Gultan Kişanak.''