Dewaya Kûmpasî ya Kobanê de ewro qerar ame dayene û cezaya seserran dîyaye sîyasetmederan. Badê qerarî Hemserekanê Pêroyî yê DEM Partî Tuncer Bakirhan û Tulaye Hatimogullari verê Kampusê Zîndanê Sîncanî de eşkerayîye daye.

Bakrihanî vat: ''No qerar tarîxê huqûqî de do sey lekeyê sîyayî bimano. Çete, mafya û qetilkarî serbest yenê veradayene. Dewayanê JÎTEMî de qetilkarê kurdan yenê veradayene la sîyasetmedarê  kurd û şorişgêrî yenê mehkumkerdene.  Ma nê qerarî nas nêkenê. Selahattînî, Fîgenî, kurdê ke Dewaya Kobanê de yenê muhakemekerdene înan zerrîya şarî de beraat kerd. Ewro mehkeme de ruhê 12ê Êlule û 12ê Adare newera bi ganî. Ma do miheqeq rojêke embazanê xo bikerê azad û pîya bi Selahattînan û Fîgenan têkoşînî rê dewam bikerê. Înanê ke qerar dayo wa bizanê nê rojî dûrî nîyê.''

Tulaye Hatimogullari zî nê vatî: ''Ma ewro şahîdîya qirkerdişê huqûqî kerd. Senî ke îdîanamê Qesre de û Merkezê Pêroyî yê MHPyî de ame nuştene, qerar zî hetê nînan ra ame dayene. Tirkîya de hukm nêmend. No qerar ke ewro ame dayene qerarê mehkemeyanê leşkerî yê cunta wetêr o. Ewro darbeya sîyasîye ya bîne bîye. Embazê ma yê ke bîlasebeb cezaya zîndanî dîyaye ci wijdanê rayrapêroyîya dinya de beraat kerd. Ma do destûr medê faşîzmî. Ma nê qerarî nas nêkenê. Nika vera faşîzmî wextê pîlkerdişê paştdayîşî yo.”