HDPyî raporê xo yê binpaykerdişanê heqanê merdiman ê 2020î eşkera kerd. Rapor de ame parekerdene ke  edalet û hêzê asayîşî hînî binê fermanê îqtîdarî de yê. 

Goreyê raporî serra 2015î ra nata 3 hezar û 695 endam, îdarekar û wekîlê HDPyî tepişîyayî, serra 2020î de 1750 endam û îdarekarê HDPyî ameyî destbendkerdene û înan ra 172 tenî tepişîyayî. Nê wekîlê HDPyî zî hema zî tepişte yê: Selahattîn Demîrtaş, Fîgen Yuksekdag, Îdrîs Baluken, Çaglar Demîrel, Abdullah Zeydan, Gulser Yildirim, Musa Farisogullari.

Çarçewa tehqîqatê 'Serebûtanê Kobanê' de 25ê êlula 2020î de 20 kesî ameyî destbendkerdene û nînan ra 17 kesî tepişîyayî. Hemsereka KCDyî Leyla Guven rê cezaya zîndanî ya 22 serran û 3 mengan dîyaye.

Destsernayîşê qeyûmano ke 19ê tebaxa 2019î de dest pêkerd serra 2020î de zî dewam kerd. 37 hemşaredarê HDPyî tepişîyayîş, 48 şaredarîyan rê qeyûmî ameyî tayînkerdene. 17 hemşaredarê HDPyî hema zî tepişte yê. Nameyê nînan wina yê: Adnan Selçuk Mizrakli (Amed), Melîke Goksu (Erzîrom), Cîhan Karaman (Colemêrg), Yildize Çetîn (Wan), Azîm Yacan (Wan), Yakup Almaç (Wan), Yilmaz Şahan (Wan), Gulistane Oncu (Mêrdîn), Mulkiye Esmez (Mêrdîn), Nîlufere Elîk Yilmaz (Mêrdîn), Adnan Topçû (Muş), Yaşar Akkuş (Îdir), Hasan Safa (Îdir), Mehmet Demîr (Êlih, Ayhan Bîlgen (Qers), Şevîne Alaca (Qers).

Salîm Kaplanî ard ziwan ke AKP bi dişmenîye nêzdîyê HDPyî beno la HDP a raşte dînamîkê sîyasetê Tirkîya yo.  Kaplanî pare kerd ke serra 2016î ra nata 20 hezar HDPyîjî ameyî destbendkerdene û 10 hezar HDPyîjî zî ameyî tepiştene.

Kaplanî vat: ''Pênaseyê faşîzmî bi xo îqtîdarê AKPyî yo. Tepişîyayîşê Selahattîn Demîrtaş û Leyla Guven mojneno ke îqtîdar seba çareserîya meseleya kurdan tênêgêreno û seba tasfîye xîret keno. Qeyûmî zî bi nê hawayî vera îradeyê kurdan hêriş o. Êyê ke xîret kenê HDP çin bikerê nika kewtî yewbînan. HDPyî morê xo da binê sîyasetê Tirkîya.''